RAFI modawat na’g nominasyon para Triennial Awards

CEBU, Philippines - Ang Ramon Aboitiz Foundation Inc. (RAFI) modawat na sa mga nominations alang sa pasidungog sa Triennial Awards 2014.  Matud pa ni RAFI Communications Manager Haidee Palapar, kini nga pasidungog bukas sa tanang tawo o grupo nga makahimo og mahinungdanong tabang aron mapauswag ang kinabuhi sa mga kabus nga katawhan sulod dinhi sa Visayas ug          Mindanao.

Gipadayag ni Palapar nga ang mga  nominado kinahanglang dili molapas sa 30 anyos ang panuigon ug usa ka natural Filipino born citizen diin kinahanglan nga laing tawo o grupo ang motuboy kaniya  sa nahimo niyang mabulahanong pagtabang sa mga kabus.

Dugang pa ni Palapar nga alang sa institution sama sa foundation, grupo o NGO importante nga makita ang hiniusa nga paningkamot ug tinud-anay nga pagtabang ug pagpakabana.

 Importante usab nga ang nominado nga adunay lig-on nga pakig-alayon sa mga organisasyon sa goberno, NGOs, civic ug people's organizations pagpadangat sa tinud-anay niini nga tumong sa pagtabang.Gipasabot ni Palapar nga ang mga nominado kinahanglan nga moagi sa  makuti nga proseso ug mosumiter sa gikinahanglan nga mga dokumento.

Ang screening committee gilangkoban sa sakop sa media, academe, business groups, PO ug NGOs.

Ang RAFI Triennial Awards gilusad niadtong Disyembre 1996 atol sa gipahigayon nga ika-30 ka tuig nga Foundation Anniversary ni Don Ramon Aboitiz ug sa iyang anak nga si Don Eduardo Aboitiz isip paghinumdum ug pagsaulog sa gipakita nila sa tinud-anay ug talagsaong pagpakabana  aron mouswag ang kinabuhi sa mga kabus ug  komunidad.

Mga nahatagan og pasidungog sa milabay’ng tuig mao sila si agriculturist Dr. Warlito Laquihon, innovator of the world-famous sloping agricultural land technology gikan sa Davao Del Sur ug ang gapasiugda sa "Peso for Health" nga programa sa Dumaguete City ug Mabinay, Negros Oriental, Dr. Chelsa Cacaldo. (BANAT NEWS)