Gireklamong junkshop di na pabalikon sa CTO
CEBU, Philippines - Ang Cebu City Treasurer’s Office miawhag g’yud nga dili na tugotan ang Abay-Abay Junk Shop nga makapadayon sa pag-operate diha sa Barangay Labangon.
Ang maong junk shop gireklamo sa mga opisyal sa barangay sanglit gibasol kini nga maoy nakapadasig sa kabataan sa pagpangawat pinaagi sa pagpasangil nga mangita’g basura nga mapatimbang apan manghapit pagpangawat.
Nahibaw-an nga ang Abay-Abay junk shop wala mahatagi og business permit kay ang nahimutangan niini anaa sa residential nga wala masubay sa lagda sa Zoning Ordinance.
Ang konseho sa dakbayan sa Sugbo daan na nga miawhag sa mga sakop sa Prevention Restoration Order and Beautification Enhancement (Probe) nga aksyonan ang reklamo sa mga opisyal sa Labangon apan wala pa sila makahimo og lakang.
Matud ni Raquel Arce ang pangulo sa Probe nga nasuta na nila nga ang Abay-Abay Junk Shop migamit sa aseras nga gipangbutangan sa mga junk materials nga ilang mapalit gikan sa mga basurero. Matud sa mga opisyal sa City Treasurer’s Office nga tungod kay wala may permit ang operation sa maong junk shop angay kini nga pahunongon. (BANAT NEWS)
- Latest
