Mga kaso sa smuggling ug collection sa customs apektado

CEBU, Philippines - Apektado ang mga kaso sa smuggling nga gipasaka sa Bureau of Customs (BOC) batok sa mga smuggler dinhi sa Sugbo sa gihimong lahugay sa maong ahensiya  sa tibuok nasud.

Matud pa ni Atty. Cris Inducil ang hepe sa Run After the Smugglers o RATS sa BOC Port of Cebu nga gumikan sa lahugay nga gihimo sa mga kadagkoan sa BOC maapektohan   ang  ilang  mga  kawani tungod   kay wala kini  plantilla position sa BOC.

Ang RATS usa ka special unit sa BOC nga gituyo sa pagtukod  aron sa pagpasaka og  kaso  batok  sa  mga  nalambigit  sa smuggling.

Gani  matud  pa  ni Inducil  nga  ubay-ubay na  ang mga nalambigit sa illegal smuggling ang napasakaan og kaso sa RATS ngadto sa lokal nga korte dinhi sa Sugbo.

Apan  tungod  sa maong lahugay mawagtang na ang maong opisina   busa  ang  mga  kaso  nga  giatiman  niini  adto  na  ihan-ok sa legal division sa BOC.

Ang  dakong  problema  karon  matud  pa  ni  Inducil  mao  nga nagtipun-og ang mga kasong giatiman sa maong buhatan.

Samtang posibleng apektado usab ang koleksiyon karong bulana gumikan sa maong lahugay.

Matud ni Conrado Abarintos ang cashier sa BOC  nga dunay mobayad  unta  og  P400 milyones apan  ilang gibalibaran kay walay mopirma sa maong transaksiyon.

Ang Customs Cebu nagkinahanglan  og P750 milyones  alang sa bulan sa Septembre ug gumikan niining  lahugay  posibleng mokunhod ang  maong collection.

Miingon  si  Abarintos  nga daghan sa mga examiner ug appraiser sa BOC ang nakadawat na sa maong kamandoan ug gani gihatagan lamang kini og lugway sulod sa napulo ka adlaw  sa pagbalik  sa ilang orihinal  nga distino.

Miingon  siya nga gumikan sa maong kamandoan wala na mamirma ang mga apektadong kawani sa BOC gumikan sa kahadlok nga makiha sa ilang mga kliyente. (BANAT NEWS)