Amerkano Gigapos Gipatay

CEBU, Philippines - Wala nay sapot, gigapos ug hubo ang tibuok lawas dihang napalgan sa mga polis kagahapon sa kaadlawon diha sulod sa giabangan niining balay ang usa ka black American nga dugay nang nagpuyo diha sa Phase 3 Santa Catalina Subdivision, sitio Ilang-ilang, sa barangay Lagtang, dakbayan sa Talisay.

Ang mga polis nakadawat og report gikan sa silingan sa biktima nga dunay komosyon diha sulod sa balay niini hinungdan sa pagresponde nila ni SPO1 Mikie Espina, PO1 Stephen Sefuesca ug PO1 Edwin Campomanes.

Ang biktima mao si Robert Leroy Turner, 70-anyos lumad nga taga Tennessee, USA napalgan diha sa kwarto  sa iyang balay.

Matud ni Espina nga si Turner kinsa usa ka retiradong magtutudlo nag-inusarang nagpuyo sa maong balay sulod na sa walo ka tuig.

Ang biktima naabtan nilang naglurag na diha sa sawog nga wala’y sapot gigapos ang mga kamot ug tiil og habol ug ang liog sa biktima gihigtan usab og habol hangtud sa baba.

Si Espina nagtuo nga gituok ang biktima maong dunay migawas nga dugo sa baba niini.

Matud usab sa maong polis nga kawat ang motibo sa maong hitabo tungod kay wala na makita ang cellphone ug pitaka ni Turner. Gituohan usab sa mga polis nga nakaila ang biktima sa mga kriminal tungod kay wala’y timailhang may “force entry” sa pultahan ug bintina sa balay.

Apan nabantayan sa mga polis sa sulod sa kwarto ni Turner nga dunay nahitabong komosyon tungod kay nagkatag na ang mga butang. Gituohan nga si Turner misukol sa mga mamumuno.

Si Espina mibutyag nga niadtong buwan sa Mayo niining tuiga napalgan sa mga polis si Turner nga susama og sitwasyon, gigapos nga gibinaklid sulod sa iyang balay ug nadiskubrehan lang dihang natangtang niini ang baat sa iyang baba ug nakapangayo og tabang sa mga silingan.

Si Turner giingong nagdumili sa paghatag og mga impormasyon human sa maong hitabo kung nakaila ba kini sa mga migaid kaniya.

Si Espina mibutyag usab nga nakadawat sila og report nga giingong si Turner matag adlaw lain-laing mga batan-ong babaye ang dalhon diha sa iyang gipuy-an.

Gani ang mga polis naka-recover og mga lista sa mga pangalan sa babaye ug schedule niini kung kanus-a sila pabisitahon ni Turner diha sa iyang gipuy-an.

Giingong niadtong Miyerkules sa mga alas 2:00 sa hapon dunay duha ka mga babayeng nibisita kang Turner ug hangtud sa alas 10:00 sa gabii sa maong adlaw nabantayan sa mga silingan nga wala pa manglakaw ang maong mga babaye. Si Espina midugang nga nagpahigayon sila og lawom nga imbestigasyon sa hitabo ug i-review nila ang kuha sa footage sa Close Circuit Television (CCTV) cam sa silingan ni Turner. (BANAT NEWS)