Lima nadakpan sa CAIDSOTG ug CIB sa operasyon kontra drugs ug masiao

CEBU, Philippines - Nagtingkagol sa karsel ang lima ka tawo human masikop sa mga sakop sa City Intelligence Branch ug City Anti-Illegal Drugs Special Operation Task Group atol sa ilang gipahigayong operasyon sa managlahi nga lugar sa dakbayan sa Sugbo.

Ang mga nasikop silang Delfin Padilla, 23, molupyo sa Ponce 2 barangay Carreta; Victor Ong anak niining 15-anyos molupyo sa Tres Borces barangay Mabolo ug Larnel Abuca, 28, molupyo sa sitio Lawis barangay Pasil. Alas-9 sa miaging gabii, nahitabo ang buy-bust operation diha sa barangay Pasil  diha sa giingong drug den ni Abuca.

Si Chief Insp. Romeo Santander sa CIB, mipadayag nga sa ilang nasuta nga si Abuca mamaligya og mga ginadiling drugas ug adto sa ilang panimalay magasuyop ang iyang mga kustomer.

Sa miaging gabii, nataymingan gayud sa mga sakop sa CIB si Abuca ug didto ilang gipahigayon ang buy-bust operation diin ila usab nga nasikop si Abuca. Nakuha gikan kang Padilla ang tulo ka dagkong putos sa gituohang shabu nga gibana-banang mokabat sa di mominos 75 mil pesos. Samtang human niini, gisunod og ronda ang giingong coordinator nga si Ong nga anaa sa ilang watchlist human usab adunay nakahatag nila og impormasyon sa gipuy-an niini.

Dugang pa ni Santader nga ila pang naaktuhan ang anak ni Ong nga nag-tally sa mga numerong napalit sa mga kostumer.

Narekober sa kapolisan ang mga kahimanan sa masiao ug kwarta nga nagkantidad og kapin 6 mil pesos nga gituohang halin.

Samtang ang mga sakop usab sa CAIDSOTG wala usab magpaulahi human sila mipahigayon og buy-bust operation sa barangay Carreta batok kang Padilla kinsa giingong subsub usab ang pagpamaligya niini og ginadiling drugas sa dapit. Ang hepe sa CAIDSOTG, Sr. Insp. Gerald Suquib, mipadayag nga atol sa operasyon  gibato sila sa mga molupyo tungod kay buot nilang luwason si Padilla. (BANAT NEWS)