Salimbangon ug Corro magtagbo

CEBU, Philippines - Makigtagbo si Kong. Benhur Salimbangon kang Daanbantayan Mayor Augusto Corro mahitungod sa paggasto sa iyang pundo alang sa health assistance program nga anaa sa panudlanan sa lungsod.

Matud pa ni Salimbangon nga mobisita siya sa buhatan ni Corro karong semanaha human si Corro  mipadayag  sa iyang  kaandam sa pagpakigtagbo sa kongresista.

 Sa dihang nilingkod si Corro sa katungdanan, wala una siya mopirma sa tseke gikan sa pundo ni Salimbangon aron ibayad ngadto sa Daanbantayan District Hospital alang sa mga nigamit sa Benhur Health Card.

 Matud pa ni Corro nga nangita una siya sa giya unsaon pagpagawas sa pundo sanglit siya ang mopirma niini.

Si Salimbangon nakigpinirmahay  og kasabutan tali sa Kapitolyo labot sa paggamit sa health card sa mga tambalanan nga iya sa lalawigan sa Sugbo nga anaa sa dakbayan sa Bogo, Daanbantayan ug Bantayan.

 Ang pundo ni Salimbangon gideposito sa tambalanan apan sayo ning tuiga iyang gibalhin ngadto sa panudlanan sa lungsod sa Daanbantayan, Medellin ug Bantayan human sa giingong wala na dawata sa tambalanan ang health card sa dihang milingkod si Bise Gob. Agnes Magpale isip kasamtangang gobernador puli  sa  gisuspenso nga  si kanhi  Gob. Gwendolyn Garcia.

Si Magpale sakop sa Liberal Party samtang si Salimbangon sa One Cebu nga gipangulohan ni Garcia.

Si Salimbangon nihatag og P1.25 milyones sa dihang si Maria Luisa Loot pa ang mayor sa lungsod sa Daanbantayan ug iyang kaalyado sa politika.

Buot si Corro nga kung ipadayun man ang maong programa, kinahanglan ang tanan makapahimulos niini. (BANAT NEWS)