Rama, mga opisyal sa CH gikiha sa MCWD

CEBU, Philippines — Gipasakaan og kaso sa kadagkoan sa Metropolitan Cebu Water District kon MCWD ang lima ka mga opisyal sa Cebu City Hall ngadto sa buhatan sa Office of the Ombudsman Visayas, Lunes sa buntag.

Sila si Atty. Joey Daluz, MCWD Chairman, MCWD General Manager Edgar Donoso, May Seno ug uban mga kadagkuan sa maong buhatan ang nipasang-at og reklamo sa kasong Grave abuse of authority, Grave Misconduct; Anti-Graft and Corruptions; Trespassing; conduct of unbecoming of public officials.

Ang gireklamo ngadto sa buhatan sa Ombudsman mao sila si Cebu City Administrator Atty. Collin Rosell; City Budget Officer Atty. Jerone Castillo; City Legal Atty. Vincent Gimena, CDRRMO Head Harold Alcontin ug Raquel Arce isip pangulo sa Cebu City Transportation Office/Road Management Authority.

Kini human sa pagpugos sa maong mga opisyal sa pagsulod nila niadtong April 15 ug 16 sa buhatan sa MCWD nga nakuhaan og video.

Ang maong mga opisyal sa MCWD mipasaka usab og reklamo ngadto sa buhatan sa Department of Interior and Local Government ug sa buhatan sa Office of the President batok kang Mayor Michael Rama sa susama nga mga kaso.

Dako ang pagtoo sa mga opisyal sa MCWD nga ang mayor maoy naghatag og kamandoan ngadto sa mga gipasakaan nila og reklamo alang sap ag take over sa MCWD.

Tumong sa pagpasang-at nila og kaso batok sa mga hingtundan aron sa pag protihir sa mga kawani ug sa nagdumala sa MCWD.

Si Gimena sa iyang bahin nibutyag nga sa higayon makadawat na sila sa official nga kopya sa complaint batok kanila anha na ang panahon nga mo file sila sa ilang counter-affidavit, pleadings ug motions kay andam ra sila motubag niini. (BANAT NEWS)