Mga Martinez wa magpalaban sa Liberal Party

CEBU, Philippines - Subling giklaro sa mga Martinez nga wala sila magpatabang sa Liberal Party diin sila nahisakop niining ilang  giatubang nga kasong graft ug malversation of public funds,  sumala   ni kanhi   Bogo City  Mayor Celestino “Tining” Martinez.

Sumala pa ni Tining wala sila makahunahuna nga moduol sa Malacañang aron makatabang sa kaso nga ilang giatubang.

Kining  maong   kaso  nag-ung-ong karon sa Sandiganbayan    ilang  giisip  nga walay labot ang ilang partido sa nahisgutan nga asunto.

Gawas niini, gitataw ni Tining  nga kompyansa kaayo sila nga makadaug sa maong kaso tungod kay wala man sila makakita nga may danyos sa habig sa goberno   kay  ang maong kwarta nauli ra man sa panudlanan sa kagamhanan.

Gitug-an usab ni Tining Martinez nga diriyot gyud silang makombinsi sa pagpasaka og kaso batok sa mga elemento sa NBI nga misilbi sa arrest warrant batok  kaniya ug sa iyang inahan nga  kanhi kongresista.

Kini subay sa pugoso niining pagsulod sa  balay sa iyang inahan dinhi sa syudad sa Sugbo ug sa dakbayan sa Bogo .

Kini  luyo  sa  kamatuoran    nga  ila  kining  gisultihan nga tua sa Manila ang iyang inahan samtang siya , si  Tining didto sa laing probinsiya.

Dugang pa niya nga kun mipugos kini sa pagsulod sa balay sa iyang uyoan nga si kanhi provincial board member Mariano Martinez hayan mopasaka gayud  sila og tresspassing batok sa NBI. (/WC) (BANAT NEWS)