Gipatay atubangan sa kapuyo

CEBU, Philippines - Nabulit sa samad pinusilan ang lawas sa usa ka construction worker nga  gipatay  sa  duha  ka wala  hiilhing kriminal sa atubangan  sa iyang  kapuyo  sulod  sa ilang  balay  sa barangay Langtad, siyudad sa Naga niadtong Martes sa alas 5:45 sa hapon.

Ang biktima mao si Rogaciano Alfornon, 43, ulitawo apan adunay kapuyo, molupyo   sa maong lugar ug usa ka construction worker.

Duha ka mga lalaki nga gihulagway nga pulos hingkod ang panuigon   nga  nagsakay  og motorsiklo ang gitumbok nga responsabli sa krimin.

Si PO1 Bobby Basabe sa Naga City Police  Station  mibutyag  sa Banat News  nga ang biktima gikan sa trabaho   ug naglingkod- lingkod  sa pultahan sa ilang  balay uban   sa  iyang kapuyo   nga  iyang ka -estorya.

Apan   kalit lang miabot ang  usa  ka  motorsiklo  nga  giluwanan  sa   duha  ka  wala  hiilhing  mga  tawo.

Kalma  nga  nanaog  ang  backrider  niini  dayong  lanit  sa iyang  armas  de fuego  ug gipusil  ang  biktima.

Sa  pagkaigo  sa  iyang  lawas,  nakadagan  pa  ang  biktima  paingon sa sulod, apan  gigukod  kini  sa laing  kriminal  ug  gipusil  sa makadaghang  higayon.

Gumikan  sa kadaghang  bala  nga  mibulit  sa lawas  sa biktima  wala  kini  makaagwanta  ug  nakabsan  sa  iyang  kinabuhi.

Dihang  natino  nga  patay na,  mibiya nga  kalma  kaayo  ang  kriminal   nga  misakay  og  balik  sa  motorsiklo  nga  giparking  sa daplin  sa karsada.

Ang mga silingan   nga  nakasaksi  sa pagbiya  sa motorsiklo  miduol  sa nagligid  sa  sawog  nga  biktima ug gidala sa Minglanilla District Hospital apan gideklarar kini sa mga doctor nga Dead on Arrival ( DOA).

Ang kapolisan mihimo pa og makuting pakisusi sa maong panghitabo sanglit dili pa man motingog ang kapuyo niini kun  pangutan-on.

Kini  tungod  sa  hilabihang  kakuyaw  ug  kahadlok  sa nakita niyang  trahedya  sa  pagpatay  sa kaugalingon  niyang  kapuyo.

Gisusi pa usab sa kapolisan ang background sa biktima aron mahibaw-an ang motibo  nganong  gipatay  kini. (BANAT NEWS)