Basurang nahipos sa mambaling dul-an 100 ka tonelada

CEBU, Philippines - Miabot og 70.72 ka toneladang basura ang nahipos sa mga sakop sa Department of Public Service sa  siyudad sa Sugbu human sa clean up drive diha sa barangay Mambaling siyudad sa Sugbo niadtong Martes sa buntag.

Ang pangulo sa DPS nga si Engr. Dionisio Gualiza mitug-an nga napuno gyud ang lima ka mga 10- wheeler dump trucks ug unom ka 6 -wheeler dump trucks nga gigamit paghakot sa basura.

Kasagaran sa mga nakuhang mga basura mga plastic cellophane, putos sa mga junk foods, ug mga malata nga mga basura sama sa panit sa mga prutas ug mga utanon, mga kahoy, mga hugaw sa tawo ug hayop ug uban pa.

Si Engr. Gualiza mibutyag mag-agi pa sa proseso sa Inayawan landfill sa syudad sa Sugbo ang mga nahipos nga basura una pa kini dad-on sa dump site sa lungsod sa Consolacion.

Si Raquel Arce kinsa mao ang labaw sa Prevention Rehabilitation Order Beautification and Enhancement kon PROBE maoy nangulo sa maong clean up drive.

Atol sa pagpanglimpyo, migamit og backhoe ang city hall gumikan kay ang ubang basura nalubong na sa lapok ug balas sa baybayon.

Lakip sa mitabang mao ang mga sakop sa City Market, PROBE, DPS, barangay environmental service ug uban pang mga buhatan sa kagamhanan sa siyudad sa Sugbo lakip na ang ubay-ubay nga mga pribadong grupo.

Gawas sa mga basura gipangguba usab ang mga kasilyas nga direktang naglabay sa hugaw diha sa dagat ug temporaryo kining gipulihan og mga portable toilets. (BANAT NEWS)