Romana mipahigayon sa iyang labing unang command conference sa CCPO

CEBU, Philippines - Sa unang adlaw sa paglingkod ni Sr. Supt. Noli Romana isip Cebu City Police Office director mipahigayon gilayon siya og panagtagbo sa tanang station commanders niini aron pakisayran kun unsay mga angayan nilang pagabuhaton aron mas palambuon pa ang ilang pagpanerbisyo sa siyduad.

Nag-unang gihisgutan mao ang anti-criminality campaigns, gipakisayran usab ni Romana gikan sa tanang station chiefs ang kaandam nila sa mga operasyon.

Samtang gitun-an usab karon ni Romana ang kabahin sa gidaghanon sa polis nga anaa magbase sa headquarters kay buot niya silang idestino sa police stations o sa police beats isip frontliners inay magtrabaho sa mga clerical works ug administrative functions.

Pasabot pa ni Romana, nga dako ang responsibilidad sa kapolisan nga anaa  mabutang sa police stations hinungdan nga gikinahanglan usab niini nga mas daghan og tawo kompara sa headquarters.

Bugtong pahimangno ni Romana ngadto sa kapolisan nga ipadayun ang ilang trabaho nga pagpanerbisyo sa katilingban, pagpakgang sa mga sayop nga buhat og paghatag ug pagtagad sa mga problema sa katilingban. (/EIM) (BANAT NEWS)