Mitulis ug mipusil sa duha ka Koreano nangadakpan

CEBU, Philippines - Upat ka gidudahang tulisan nga suspek sa pagpanulis ug pagpusil sa duha ka  Koreyano nadakpan sa mga sakop sa Theft and Robbery Section sa Cebu City Police Office human sila masikop sa sitio Kalubihan Banawa sa barangay Guadalupe sa dakbayan sa Sugbu.

Ang mga nasikop mao silang Juan Ramirez alyas Tonting, 25; Anthony Migahisa alyas Tonton, 25; Arturo Mori, 30; Genis Ermitano alyas Momet, 38, pulos molupyo sa maong dapit.

Matud pa sa hepe sa kapolisan sa Theft and Robbery Section Chief Insp. William Alicaba ilang nasubay ang tulo diha sa maong dapit human dunay nakahatag kanila og impormasyon bahin sa ilang nahimutangan.

Sumala pa nga dunay nadawat nilang impormasyon nga ang upat maoy responsable sa pagtulis ug pagpusil kanila ni Anna Chu, Choi Soon Chul ug Heo Yekang nga gitulis diha sa dalan Tres Borces sa Mabolo kapin usa ka semana na ang nakalabay.

Matud pa nga positibong gitumbok sa saksi nga ang upat mao gyud ang mga tulisan sa mga Koreano ug mitakdo usab sila sa nakuhang Close Circuit Television Camera footage.

Atol sa ilang pagkasikop si Tonting nakuhaan og kalibre .45 samtang silang Tonton ug Mori nakuhaan usab kini og kalibre .38 samtang si Momet nakuhaan usab og drug paraphernalia. (/EIM) (BANAT NEWS)