Programa sa Cebu City kopyahon ni Bokal Yayoy

CEBU, Philippines - Nagtinguha si Bokal Raul “Yayoy” Alcoseba nga kopyahon ang ubang programa sa syudad sa Sugbo ngadto sa lalawigan diin siya karon nag-alagad na isip sakop sa hunta probinsiyal.

Kini sama sa pagtukod sa Office of the Senior Citizens Affairs ug Provincial Sports Commission.

Si Alcoseba, tulo ka terminong nag-alagad isip konsehal sa syudad sa Sugbo sa wala pa napiling sakop sa hunta probinsiyal niadtong Mayo 13 nga eleksiyon.

Sa konseho sa syudad, siya ang nangulo sa committee on markets ug committee on games, amusements, and sports. Sa Kapitolyo, siya ang gibutang isip pangulo sa committee on public services, ug senior citizens.

Matud pa ni Alcoseba nga nagpanday siya karon og ordinansahon sa pagtukod sa maong mga buhatan nga gikatakdang iyang iduso sunod buwan.

Namatikdan ni Alcoseba nga dili sama sa syudad sa Sugbo, ang mga programa sa mga senior citizens gipatuman sa Provincial Social Welfare and Development Office (PSWDO).

Buot si Alcoseba nga may iya gyud nga buhatan nga moatiman sa panginahanglan sa katiguwangan.

“Sa province gud mura ra man nakalimtan ang mga senior citizens,” matud pang Alcoseba.

Usa sa gitan-aw ni Alcoseba ang paghatag og hinabang pinansiyal sama sa gihimo sa kagamhanan sa dakbayan sa Sugbo.

Sa higayun nga matukod na ang buhatan, gahinan usab og buwag nga pundo nga alang lang gyud sa mga programa sa katiguwangan, sumala pa ni Alcoseba.

Samtang buot usab si Alcoseba nga adunay motutok sa programa sa paugnat sa kusog sa kabataan. (BANAT NEWS)