Metro cebu gilunopan!

CEBU, Philippines - Liboan ka mga tawo nga kasagaran mga trabahante ug ingon man mga sakyanan ang nangatanggong sa dalan gikan sa pagkilom-kilom niadtong Sabado sa hapon hangtud sa kaadlawon kagahapon sa adlaw’ng Domingo tungod sa grabeng pagbaha.

Lapad nga bahin sa downtown area Cebu City ug sa Mandaue City ang gipanglunopan sa tubig baha gumikan sa grabeng kakusog sa pagbunok sa ulan nga miresulta sa pag-awas sa mga kanal ug lapas sa hawak ang baha sa dalan.

Ang gipanglunopan mao ang dalan M.J. Cuenco Avenue, Sikatuna St.sa Parian; Bonifacio St gikan sa Parian padung sa Tinago; Sanciangko  St.gikan Parian padung sa Kalubihan; Junquera St. sa Kamagayan; dalan Colon; V.Gullas ug D. Jakosalem St.; ingon man sa barangay Guadalupe.

Gilunopan usab ang mga dalan sa Carreta ilabi na sa padung sa North Reclamation Area ug dalan MJ Cuenco padung sa Mabolo nga miresulta sa daghang mga sakyanan ug motorsiklo ang nangapagngan sa ilang mga makina. Diha sa atubangang bahin sa Sungold, SM Department Store, Mabolo Police Station naglunop usab sa baha, gani ang mga polis nga naka type B pa miubog sa tubig baha aron pagtabang sa paggiya sa trapiko tungod kay nagkabara-bara na kini gumikan sa wala na paggana sa mga traffic lights.

Liboang mga trabahante gikan sa nagkadaiyang mga malls ang misungasong sa baha, dunay uban nga nanakay og traysikad nga tag-singko ang bayad kada usa aron lang makatabok sa dalan ug duna say nagbaklay nalang tungod kay wala na moirog pa ang dagan sa trapiko.

Usa kanila ang wedding organizer nga taga Lapulapu City kinsa nakahinabi sa Banat News, gikan sa usa ka dakong department store sa North Reclamation Area sa Mabolo ug nagdala og mga gamitonon sa gi-organisar niyang kasal.

Nadala pa niya og pasiaw ang nasinating pagkahumod sa baha gikan sa maong department store padung sa ganghaan sa Saint Joseph Parish Church sa Mabolo.

“Karon pa ko nagsapatos sukad-sukad nga mangompra ko, karon pa gyud ko gibahaan,” matud pa niini.

 Diha sa dalan Dela Montaña sa Mabolo, nagdasok usab ang mga sakyanan tungod kay nag-malfunction ang traffic light sa eskina padung sa Ayala Business Park maong hasta ang padung sa Salinas Drive sa Lahug nga gilunopan usab nangatanggong.

Ang dalan subay sa Panagdait lutsanan gikan sa A.S. Fortuna sa Mandaue City nag-bumper-to-bumper usab padung na sa Ayala Business Park.  Susamang eksena usab ang masinati sa mga dalan padung sa Guadalupe, Labangon ug Inayawan.

Sa barangay Kalunasan, walo ka mga pamilya nga nagpuyo sa upat ka mga panimalay sa sitio Lareja ang gimandoang papahawaon tungod sa pagdahili sa yuta daplin sa Guadalupe River.

Matud pa ni Alvin Santillana, pangulo sa Cebu City Disaster Risk Reduction Management Council (CCDRRMC) nga nasulod sa 3-meter easement gikan sa sapa ang maong mga balay nga gidili sa balaod.

Ang CCDRRMC uban sa Cebu City Police Office, City Bureau of Fire Protections; barangay disaster brigade volunteers uban sa mga opisyales sa City Hall pinangulohan ni Mayor Michael Rama nagtigom kagahapon sa hapon hangtud gabii aron pangitaan og solusyon ang mga nakitang problema niadtong Sabado sa gabii.

Samtang sa habig sa Mandaue City, miawas ang Mahiga Creek ug maoy nakaingon sa grabeng pagbaha sa mga dalan sa reclamation area.

Gilunopan ang Ouano Avenue sa reclamation area, Innodata sa barangay Subangdaku, dalan A.S. Fortuna sa barangay Bakilid.

Si Roger Paller nga maoy Public Information Officer (PIO) sa dakbayan sa Mandaue miingon nga lakip sa gilunopan mao ang mga dalan sa barangay Banilad hinuon wala kaayo kini magdugay tungod kay dali na man kaayo ang iyang paghubas. (BANAT NEWS)