DSWD-7 nagtukod og dakong bodega

CEBU, Philippines - Ang Department of Social Welfare and Development sa Central Visayas (DSWD-7) nagtukod og mas dako nga  bodega alang  sa  mga  hinabang  sa katawhan.

Kini  samtang gisiguro  nga  pinaagi  niini   dali nga pagtabang ngadto sa mga Local Government Units (LGUs) sa panahon sa katalagman  ilabi  na  karong  nagsingabot na ang panahon sa ting-uwan.

 Matud pa ni Jaybee Binghay, tigpamaba sa DSWD-7 nga ang maong bodega gitukod aron mapatuman ang dinalian  nga  pagresponde sa  mga  panginahanglan.

Usa  kini  ka   organisado ug malahutayong  paghatod sa serbisyo samtang magmugna og epektibong komunikasyon o sistema sa impormasyon alang  sa mga  molupyo  nga  silbihanan.

Samtang gipaniguro usab ni DSWD-7 Regional Director Mercedita Jabagat ngadto sa publiko nga ilang ipaandam ang ilang Quick Response Team (QRT) ug usab mga kahimanan aron katabangan gilayon ang publiko ilabi na sa pagpang-apod-apod og relief goods atol sa panahon sa katalagman.

Dugang pa ni Jabagat  nga ang DSWD 7 naggahin og  P1,000,000 nga pundo  agi og pangandam sa panahon sa kalamidad .

Kini  gawas sa  P3,000 nga Family Packs (FP) sa Sugbo, P1,000 ka FP sa Negros Oriental, P1,000 FP sa Bohol ug P500 ka FP sa Siquijor.

Gisaysay ni Jabagat nga ang maong mga FP nga naglakip sa food ug non-food items gipahimutang nang daan  sama  sa pangkatulog ug usab galamiton para magluto, toiletries, footwear ug underclothing diin kining maong mga butang ipanghatag ngadto sa LGUs isip dugang suporta ilabi na sa panahon nga limitado lamang ang pundo niini.

Gibutyag ni Jabagat nga ang maong bodega anaa mahimutang sa 1,000 square meter property diin hazard free kini ug accessible usab sa transportasyon. (BANAT NEWS)