Ulitawo misukol sa polis tipi

CEBU, Philippines - Natusak –tusak  sa bala ang patay’ng lawas sa armadong lalaki dihang misukol kini   sa mga polis nga misita kaniya atol sa gipahigayong disco didto sa barangay Pooc sa lungsod sa Sta. Fe sa isla sa Bantayan kagahapon sa ala 1:30 sa kaadlawon.

Ang biktima nga namatay diha-diha mao si Samuel Cayuban, hingkod, ulitawo ,  nga  taga  Sitio Matsamban, barangay Okoy, sa Sta Fe.

Samtang  nadakpan usab  ang  kauban  sa biktima   nga  si Samuel Baliton, 28, ulitawo ug nagpuyo ra gihapon sa maong lugar. Ang gitumbok nga mga  responsabli sa kamatayon  ni Cayuban mao sila si PO3 Erwin Odena ug PO1 Isabelo Carasena Jr., mga sakop sa Sta Fe Police Station.

Sila  maoy   gidestino  sa pagbantay sa  disco  sa maong  higayon  nunot sa nagsingabot nga pista sa maong lugar.

Si PO2 Erik Illustrisimo sa Sta Fe Police Station  mibutyag  sa Banat News  nga  samtang nagbantay ang mga polis sa gipahigayung disco usa ka tanod ang misumbong  kanila  bahin sa nasigpatan nga armadong lalaki nga nagsuroy -suroy sa diskohan   kansang  pul-an  sa armas  niini gipagawal  sa iyang  hawak,

Sa pagsusi nila ni PO3 Odena ug PO1 Carasena nakit-an nila ang biktima nga diha sa kilid sa diskohan ug  ila kining   gimanduan sa pagtahan sa maong armas.

Apan sa paglanit  niini  sa armas  gikan  sa iyang  hawak  kalit kining  mipusil   kang PO1 Carasena ug maayo  kay wala makaigo. Diha-diha mibawos og pusil ang duha ka polis ngadto sa biktima ug maayong pagkatusak- tusak  sa dughan, tiyan ug kilid  niini  sa gibana-banang  unom ka mga  bala.

Wa magdugay  nahagba  sa gawas sa diskohan ug ang mga tawong didto  sa maong  lugar nagkatibuwaag  sa pagpanagan tungod sa kahadlok.

Gisuwayan pa kini  pagtabang   ug  gihatud  ngadto sa Bantayan District Hospital apan gideklarar nga dead on arrival (DOA)  didto.

Samtang giapil og dakop ang kauban sa biktima nga si Baliton tungod sa pagsuway niini og babag sa mga polis ug dihang gisukit- sukit nakuhaan kini og duha ka  paketing shabu.

Didto  sa motorsiklo niini laing lima ka stick sa marijuana   nga  gisud   sa u-box.

Wala pa gyuy plate number ang motor ug natanggong na kini karon sa karsel aron pasakaan og kasong paghupot  og gidiling drugas.

Ang kapulisan nga mirespondi sa crime scene nakapunit  sa kalibre .45 nga armas sa biktima ug adunay duha ka back up magazine nga  taglima ka bala  ang  sulod, samtang  10 usab  ka kapsula sa kalibre .45. Sila si PO3 Odena ug PO1 Carasena gipaubos pa usab sa imbistigasyon bahin sa     maong hitabo.  (BANAT NEWS)