Eskuylahan abunohan lang di balhinon–Cortes

CEBU, Philippines - Ang temporaryong pagbalhin sa mga tinun-an sa Ceasar Cabahug Elementary School sa barangay Looc, dakbayan sa Mandaue ngadto sa laing tulunghaan maoy lakang nga pagahimoon ni Mayor Jonas Cortes.

Kini sukwahi sa nahaunang taho nga ibalhin ang maong tulunghaan ngadto sa laing dapit   nga paliton   sa kagamhanan sa maong dakbayan.

Giklaro ni Mayor Cortes nga lisud na niining panahona ang pagpangita pa og laing luna nga kabalhinan sa maong tulunghaan gawas nga nagkinahanglan kini dakong kantidad nga salapi.

Gitataw niya nga ang bugtong karon niyang plano alang sa pagsulbad sa nasinati nga suliran sa mga kabataan ug magtutudlo sa maong tulunghaan mao ang pag-abuno sa luna nga mahimutang sa palibot  niini.

Kini aron  nga   dili na maabot sa dagat sa panahon nga modako ang taub.

Matud pa ni Cortes nga sa mga adlaw nga  ipaguba   ang tulunghaan, himoon  usab  ang pag-abuno sa luna nga nahimutangan sa maong tulunghaan. Unya  mahitabo usab ang temporaryong pagbalhin sa klase sa mga tinun-an sa bakanting lawak saringan sa City Central School sa barangay Centro sa maong dakbayan.

Dugang pa niya nga daghan ang bakanting lawak saringan ang City Central School sanglit nahuman na man sa  pag-renovate   ang karaan niining building. Nahuman na usab ang bag-ong building nga gipatukod sa Ramon Aboitiz Foundation.

Gipaniguro niya nga sa higayon nga mabalhin ang klase sa Ceasar Cabahug Elementary School ngadto sa City Central School  iyang idistino ang duha ka mga bus nga sakyanan sa dakbayan nga maoy mohatod ug kuha sa magtutudlo ug mga tinun-an. Si Mayor Cortes miingon nga mokabat sa P25 milyones ang pundong salapi nga maoy magamit sa pag-abuno sa luna  nga nahimutangan sa tulunghaan sa Ceasar Cabahug Elementary School.

Ang maong kantidad iyang pangitaan og ikadugang  alang sa paghingpit  sa kausaban sa kasamtangan nga nahimutangan sa maong tulunghaan. WC (BANAT NEWS)