Vigilantes milihok sa siyudad sa Dumaguete

CEBU, Philippines - Dumaguete City--Gidudahang drug suspect girakrakan sa Dumaguete City nga maoy ikaupat nga biktima sa ‘vigilante style’ killings sa siyudad  sulod lang ning bulana.

Ang biktima mao si Crisforth Santillan Tantio, 29, taga Purok Sampaguita sa Canday-ong  ug kasamtangang nagpuyo sa East Balabag, Valencia.

Si Tantio girakrakan samtang nagsakay sa iyang multicab pauli sa ilang balay gikan naghatud sa iyang mga anak ngadto sa eskuylahan.

Ang biktima gitaparan og motorsiklo ug gipaulanan og bala pag-abot sa Tinago Bridge diha sa Sitio Canday-ong, Barangay Calindagan sa Dumaguete City.

Matud pa ni Insp. Don Richmond Conag, hepe sa investigation section sa Dumaguete City police , nabulit og samad pinusilan sa nawong, ulo ug lawas ug nahagbong ang iyang multicab sa kimba sa taytayan.

Gidudahang automatic submachine gun ang gigamit sa mga gunman. Nagpasad usab ang katorse ka mga basiyo sa bala diha sa maong taytayan.

Sumala pa sa report, ang biktima wala na malakip sa mga drug personalities sa Dumaguete City apan giingong aduna kini mga pending nga kaso sa lungsod sa Bacong tungod gihapon sa illegal drugs.

Gikatakda pa hinuon kining kompirmahon sa kapolisan sa Dumaguete didto sa maong lungsod.

Sagad sa mga biktima sa vigilante style killings sa Dumaguete pulos dunay rekord sa kaso sa mga illegal drugs.

Sumala pa ni Supt. James Goforth, hepe sa Dumaguete City Police Office nga bisan kuwang sila sa mga ebidensyang makasuporta sa pagduda sa mga tawo posibleng dunay naglihok nga mga “vigilantes” sa siyudad.

Usa sa gikagul-an ni Goforth mao ang daw susama og gidawat lang sa publiko ang mga nagsunod nga pagpatay sa mga tawong dunay mga criminal records sa siyudad.

Matud pa niya dili makatarunganon, kriminal man o inosente ang patyon nga wala’y due process ug dakong sala ang pagbutang sa balaod sa ilang mga kamot. (/EIM) (BANAT NEWS)