Davide wa magdahom nga abi-abihon ni Garcia

CEBU, Philippines - Nagtagbo kagahapon sa buntag si outgoing Governor Gwendolyn Garcia ug ang umaabot nga gubernador Hilario “Junjun” Davide III sa opisina sa gobernador.

Kini ang labing unang higayon nga nagtagbo ang duha gikan sa nakalabay’ng eleksyon. Gipildi ni Davide si kongresista Pablo John Garcia nga igsuon sa gobernador sa pagka-gobernador sa lalawigan.

Si Gwendolyn Garcia midaog pagka-kongresista sa ikatulong distrito sa probinsya sa Sugbo ug kagahapon gi-congratulate ni Davide si Gwen sa iyang pagdaug.

Miingon si Garcia nga i-ampo niya si Davide nga malampuson niyang madumala ang lalawigan.

Si Garcia mismo ang mi-tour ni Davide sa executive building sa Provincial Capitol sugod sa Governor’s office, human sa karaang conference room ug sunod ang Governor’s gallery.

Human niini si Garcia ug Davide misulod sa conference room aron makigkita sa mga department heads nga nagpaila-ila sa ilang kaugalingon didto ni Davide.

Gi-discuss ni Garcia ang iyang 12-point agenda didto ni Davide, ug gituki ang mga programa ni Garcia sa iyang unang termino sugod sa 2004 kutob sa ika-tulo niyang termino.

Usa sa gituki nga diskusyon mao ang Suroy-Suroy Sugbo nga programa ni Gwen nga giduha-duhaan ni Davide kung iya bang padayunon, apan human sa pagpasabot sa gobernador mipadayag si Davide nga iyaha kining padayunon apan adunay mga kausaban sa programa. Giangkon ni Davide nga nakugang siya pagpatawag sa chief of staff ni Garcia sa iyang transition team nga makig-meeting si Garcia.

Hinuon, miingon si Davide nga sa wala pa kini mahitabo nagplano na siya mosuwat kang Garcia aron makigtagbo alang sa turn-over.

“Quite frankly, wala gyud ga expect. Very accommodating. She was kind enough to give me a tour,” matud pang Davide.

Human sa meeting gisiguro ni Garcia kang Davide nga suportahan niya ang mga department heads sa tanan kinahanglanon ni Davide sa iyang termino.  (BANAT NEWS)