Negosyante gilabniha’g bag P60 mil ang sulod

CEBU, Philippines -  Pwerting minghoya sa usa ka ginang nga negosyante human kini labnihe sa iyang bag nga adunay sulod nga P60 mil  nga halin sa iyang tinda   nianang adlawa samtang naglakaw sa karsada paingon sa ilang pinuy-anan niadtong Biyernes sa alas 6:00 sa gabii.

Ang biktima mao si Aurea Talaugon, 57 , minyo, nagpuyo sa barangay Uno,  Tuburan ug usa ka negosyante sa maong lungsod. Matud ni PO1 Joseph Bejer sa Tuburan Police Station sa  pakighinabi  sa  Banat News   nga  ang biktima gikan sa iyahang tindahan ug paingon na unta kining mopauli nianang hapon na aron mopahuway.

Apan kompiyansa  lang kaayu kini nga naglakaw nga nag-inusara sa karsada paingon sa iyang balay nga gisambilay ang iyang bag tungod kay naandan na niini nga maglakaw mopauli matag hapon.

Dihang  pag-abot niya sa maong lugar  wala kini makamatikod nga nagsige na og sunod sunod kaniya ang suspek nga gihulagway lang nga nagbinugtong ug pag-abot sa maong mingaw -mingaw nga dapit gikalitan niini   pagduol   ang  biktima ug  kalit  nga  gilabni ang gisambilay niini nga bag dayung dagan pahilayo.

Ang biktima nga nakalitan ug wala makabantay hapit madusmo tungod sa kakusog paglabni sa iyang bag nga maoy gisudlan sa P60 mil nga  halin sa iyang tindahan.

Way nahimo ang biktima tungod kay kusog kaayong nakadagan pahilayo ang suspek ug igo na lang kining midangop sa buhatan sa kapolisan aron ipa- blotter ang maong hitabo. 

Hinuon ang kapolisan mihimo pa karon og follow aron matumbok ang suspetsadong esnatser. (BANAT NEWS)