Taboan market mas gipanindot
CEBU, Philippines - Human sa pormal nga inauguration sa bag-ong merkado sa Taboan sa wala pa ang eleksyon ning tuiga, plano sa mayor nga panindoton pa ang nabantog sa mga buwad nga boneless Danggit aron ikapasigarbo sa mga Sugbuanon. Si Cebu City Mayor Michael Rama mimando ni city administrator Atty. Jose Marie Poblete ingon man market administrator Raquel Arce nga sigurohon nga ang mga turista ug lokal nga konsumidor mahingangha sa kaanindot sa maong merkado.
“I want to showcase Taboan market,†si Rama mideklarar atol sa iyang personal nga pagbisita sa merkado kagahapon.
Ang Taboan market rehabilitation project nagkantidad og P25milyones diin giguba ang karaang merkado ug gihan-ay ang stalls sa mga tigbaligya og buwad.
Matud ni Arce, ang mga tindera sa Taboan miubos gikan sa 160 ngadto sa kapin 120. Nabantog ang Taboan market tungod sa baligyang buwad nga tuyoon pagpalit sa mga lokal ug langyaw nga turista dinhi sa Sugbo.
Gibutangan na kini karon og lapad nga parking area ug dili na alimuot. Tungod sa mga baligyang buwad gihimo ang Kaplag Buwad Festival kada buwan sa Abril. Ang merkado sa Taboan nahimutang sa dalan Tres de Abril barangay San Nicolas, dakbayan sa Sugbo. (BANAT NEWS)
- Latest