City administrator sa Talisay anak sa mayor

CEBU, Philippines - Ang bag-ong napiling mayor sa dakbayan sa Talisay nga si Johnny Delos Reyes mitudlo sa iyang anak nga maoy mopuling city administrator sa siyudad inig lingkod na niya isip mayor karong Hulyo 1, 2013. Si John Yre Delos Reyes, 31-anyos, usa ka license custom’s broker ug ika-lima sa pito ka mga anak ni Delos Reyes mibutyag sa mga tigbalita kagahapon nga gikauyonan na sa ilang pamilya ang maong desisyon sa ilang amahan.

Matud ni Yre nga ang iyang negosyo ipadumala na unya niya kini sa ilang kamanghuran nga igsuon kinsa bag-o lang mitapos sa kursong Bachelor of Science in Customs tungod kay buot niyang mo-focus unya isip city administrator sa Talisay. Giangkon ni Yre nga ang maong posisyon usa ka dakung tahas ngadto kaniya apan matud niya nga gipangandaman na niya kini.

Matud ni Yre nga usa ka honest ug transparent nga pamunoan ang ilang ipatuman sa Talisay inig lingkod na unya sa iyang amahan.

Gibutyag ni Yre nga usa unya sa iyang buhaton mao ang pagkig-coordinate sa mga department heads aron makahibawo siya sa status karon sa siyudad ug himoan niya kini og report. Apan matud usab niya nga posibleng dunay mahitabong revamp sa mga department heads  kung mabantayan nilang dili epektibo sa buhatan nga iyang gihuptan ang usa ka department head o dili supportive sa bag-ong administrasyon.

Gawas niini ang bag-ong administrasyon dunay planong programa alang sa mga kabus nga mabansay-bansay kini og panginabuhian. Si Yre midugang nga paningkamutan sa bag-ong administrasyon ang kalamboan sa Talisay. (BANAT NEWS)