Motor vs. traysikol 6 angol

CEBU, Philippines - Kritikal  ang  kahimtang  sa upat  sa unom  ka  pasahero  sa  motorsiklo  ug  traysikol  nga  nagdinasmagay  didto  sa Sitio Poo, barangay Balud, sa lungsod sa Dalaguete niadtong Sabado  sa hapon. Ang motorsiklo nga Honda XRM 125 kolor itom ug puti gimaneho ni Marlon Nievs, 34, minyo,  nga taga barangay Nug-As,  lungsod sa Alcoy,  ug  ang  iyang   angkas  mao ang usa ka Merry Bejeca, 33, dalaga,  nga  taga Langkas, Dalaguete apan temporaryong nagpuyo sa barangay Balud.

Ang ilang kadasmag  mao  ang  traysikol nga gimaneho  ni Agustin Kiamko, 58, minyo,  nga  taga barangay Balud  usab kansang  mga  pasahero  mao  ang  iyang  kapuyo  nga si  Catalina Limbaga, hingkod, Genelyn Balansag, 25, dalaga,  nga  taga Lahug, siyudad sa Sugbo apan temporaryong nagpuyo sa Obong, Dalaguete, ug Stephanie Remo,  20, dalaga,  nga  taga   barangay Consolacion, Dalaguete. Si SPO1 Veronico Centino, sa Dalaguete Police Station mibutyag  sa Banat News   nga  ang motorsiklo gikan sa lungsod sa Alcoy paingon sa lungsod sa Dalaguete   nga  kusog  kaayong   nagdagan samtang  ang traysikol  gikan  usab  sa  pikas  nga direksyon.

Matud pa   sa pag-abot  niini  sa kurbadahon nga bahin sa maong lugar mikawat sa pikas linya  sa karsada  ang motor ug  tungod  sa kakusog sa dagan  niini  naglisud  na  pagpugong  ang  drayber  hinungdan  nga  mideretso  kini  og  dasmag  sa kasugat  niining  traysikol.

Nagbuwag  pagsaliring  sa karsada  ang  duha  ka sakyanan  ug nangalagpot  usab  silang  tanan  nga nagsakay  niini.

Ang mga polis  ug mga estambay sa maong lugar maoy nagtinabangay  sa  paghatud  sa  mga  biktima  ngadto  sa  Cardinal Rosales Hospital apan ang upat ka biktima, ilabina ang drayber sa  motor ug sa traysikol  ug  ang  duha  nila  ka  angkas maoy nagrabihan   hinungdan  nga  gi-transfer dayon   kini sa tambalanan dinhi sa dakbayan sa Sugbo. (BANAT NEWS)