Nangisyu og untol nga tseke gipangita

CEBU, Philippines - Gipangita  sa  kapolisan sa dakbayan sa Lapulapu ang usa ka tawo nga gireklamo sa  mga tagdumala sa nagkalainlaing establisamento sa   maong dakbayan  nga namalit  sa  ilang  mga  produkto  apan  gibayran  sila  og  mga  tseke  nga walay  pundo  sa bangko.

Si SPO1 Elmer Canillo sa Theft and Robbery Section sa kapolisan sa maong dakbayan  miila  sa suspetsado  nga  si    Aljohn Abrenica nga nagpuyo sa barangay Buaya sa maong dakbayan.

Matud pa ni SPO1 Canillo  nga  base  sa  mga  reklamo  sa  mga  negosyante   nga nakadawat   sa  mga tseke sa  suspek   nga  ang  mga tseke nga  ilang  nadawat  gikan sa  suspetsado  may nagkantidad  og   P100,000, P300,00, P50,000,  ug uban pa.

Ang  mga  gipangompra  sa suspetsado  gikan sa mga baligya  sa mga biktima  mao  ang mga  construction material,  linatang  pagkaon,  bugas, ug  uban  pa.

Ang kauban ni Abrenica  sa maong modus operandi mao ang usa ka babaye nga nagpaila lamang sa ngalan nga Chit Booc Baya nga nagpuyo usab sa barangay Buaya sa maong dakbayan.

Nadiskobre  sa  mga  biktima  nga   untol  ang maong  mga tseke  dihang  wala  na  kini  dawata  sa  bangko  nga  ilang  gidepositohan  kay  wala nay  pundo  nga  kuwarta  ang  suspetsado  alang sa maong  mga tseke  ug  giisip  na  close  account  ang  maong  mga  tseke.

Si SPO1  Canillo miingon nga ilang natultolan ang giabangang  balay  sa   mga suspetsado sa  barangay Buaya apan nanglayas  na  kini ug sumala sa gitug-an ngadto kanila sa tag-iya sa balay nga niadto pang miaging Sabado   namiya.  (BANAT NEWS)