Namotar bay gilungkab, P300 mil wagtang

CEBU, Philippines - Dul-ang P300,000  ang kantidad sa salapi, alahas,  ug  uban  pang  mga  butang  nga  gikiriw  sa  wala  hiilhing kawatan kinsa  milungkab  sa usa  ka balay  sa seaman nga  gibiyaan  sa tag-iya  kay  mibotar  didto sa  Brgy. Yati, lungsod sa Liloan   sa miaging  Lunes  sa buntag, adlaw  sa election.

Si SPO1 Alex Wagas sa  Liloan  Police  Station  miila  sa  magtiayong  biktima  sa maong  kawat  nga  sila  si Ismael  ug Erberta Tabano, pulos  hingkod  ug  molupyo  sa maong  lugar.

Matud  pa  ni SPO1 Wagas  nga  human  nila  madawat  ang  sumbong  sa  mga  biktima, ila  dayon  kining  girespondihan  ug ilang nasayran  sa  ilang  imbistigasyon  nga  gihimo  nga  nahitabo  ang  pagpanglungkab  dihang  gibiyaan  sa magtiayon  ang  ilang  balay  kay  mibotar  didto  sa eskuylahan  nga  dili  kaayo  layo  gikan  sa ilang  pinuy-anan.

Atol sa imbistigasyon, gibutyag sa magtiayong  Tabano sa kapolisan nga miadto  sila   sa  Yati Elementary School  kay mibotar  nianang  alas 10:00  sa buntag .

Apan  sa ilang  pagpauli  nianang   pagka-alas `12:00  sa  udto , nahibulong  sila  nga  giguba na  ang  ilang  bintana  ug  nagpasad  sa sawog   ang  mga buak  nga bildo niini   nga  maoy giagian  sa   kawatan.

Si PO2 Ronald Rosello sa kapolisan sa Liloan, mibutyag  sa Banat News  nga  usa ka retired teacher si Erberta samtang  ang  bana  usab  niini  nga  si Ismael  usa  ka  seaman .         

Nasakiyo  sa  mga  kawatan   ang   2 ka bulawang pulseras nga nikantidad ug P80 mil;  3 ka  bulawang kwentas nga balor og P 85 mil;  7  ka  paresan   sa bulawang ariyos, P 50 mil;   5  ka  relo  de pulso,  P35 mil; usa ka laptop, P24 mil; usa ka lisensyadong 9mm caliber pistol (ARMSCOR); ug cash P4,000 ug $400. Sa  pagkakaron padayon  pang  gipanid-an  sa kapolisan  ang  kawatan  aron  kini  mailhan  ug  kapasakaan  og  tukmang  kiha. (BANAT NEWS)