Gitumbok nga vote buyer, mga sugarol diay

CEBU, Philippines - Gumikan sa kaabtik  sa  mga  giingong  namalit  og  boto,  pulos  na lang  sumbong  ug  estorya  ang  nadawat  sa  kapolisan  niadtong Domingo  sa gabii apan  wala  silay  nadakpan  sa  mga  dapit  nga giingong  gipamalitan  og  boto  sama  sa  barangay  Cansojong, Tanke, Lawaan I  ug  Lagtang  sa dakbayan  sa Talisay.

Si Superintendent Elmer Lim, officer-in-charge sa Talisay City Police Station mibutyag sa Banat News kagahapon nga  may  grupo  sila  nga gironda, apan  di  man  diay  mga  vote buyer,  kundi mga  sugarol  diay  nga   naghantak,  busa  imbis  sinobreng  kuwarta  ang  makita, antugon  na lay  nasaksihan   sa kapolisan  didto  sa hantakan.

Hinuon  miingon  si Lim  nga malinawon ang eleksiyon sa Talisay. Kagahapon sa buntag  ang medical team sa kapolisan sa lalawigan  miabot  didto  sa  dakbayan  ug  nanghatag og mga  tambal  sa  mga   botante nga naglinya.

Nasuta  usab  nga  si Samsam Gullas, kandidato sa pagka-kongresista sa unang distrito sa probinsiya  didto  mikasar  sa iyang  boto sa Tabunok Elementary School  sa alas 10:30 sa buntag.

Samtang si Kongresista Eduardo Gullas   didto  usab  mobotar sa Tanke Elementary School sa pagka-alas 11:00  sa buntag. Sa lungsod sa Minglanilla si Chief Superintendent Timmar Jomio Alam, hepe sa kapolisan sa maong  lungsod nagkanayon nga malinawon usab  kaayo  ang  piniliay  didto.( /WC) (BANAT NEWS)