Mga baligya sa vendor gipangimbargo

CEBU, Philippines - Mikabat sa napulo ka mga vendor ang naimbargohan sa ilang mga baligya kagahapon sa buntag tungod kay giingong dunay nahimong kalapasan sa ilang pagpaninda.

Si Edwin Nierves sa anti-sidewalk vendor taskforce nga nahinabi sa Banat News kagahapon nagkanayon nga ang maong mga vendor diha maninda sa sitio Molave, Macaraya ug sa Nacario Trade Center sa barangay Tabunok.

Matud niya  nga ang maong mga vendor naninda kini og mga isda, buwad ug uban pang mga gidiling ipabaligya diha sa lugar.

Kahinumduman nga human ang tagdumala sa NTC ug kagamhanan sa siyudad nag-atubangay ngadto sa korte, ang korte miluwat og kamanduan nga gidili og pagpamaligya og mga bugas, karne, isda, buwad ug mga poultry products diha sa nahisgutang lugar.

Tumong sa siyudad nga ang mga vendor mamalhin ngadto og paninda sa bag-ong merkado publiko sa barangay Lagtang. Matud ni Nierves nga ang maong mga vendor walay mga permit nga naninda diha sa lugar.

Apan kahinumduman usab nga ang mga vendor mireklamo kaniadto tungod kay buot silang mokuha og business permit apan giingong dili sila tugotan sa siyudad nga makalukat.

Hinuon matud usab ni Nierves nga walay nahitabong kagubot tali sa task force kaganiha atol sa operasyon.

Kahinumduman nga sa milabay’ng tuig ang mga sakop sa taskforce gitabangan og bato ug pospos sa mga vendor dihang ang ilang mga baligya gipang-alsa kini ug gikarga ngadto sa truck. Niadtong higayona usab usa ka sakop sa taskforce ang napusilan.

Si Nierves nagkanayon nga kanunay ang ilang operasyon batok sa sidewalk vendors apan ang mga vendors usab magbantay kung dunay mga sakop sa task force ug dayon managan.  (BANAT NEWS)