Talisay andam na sa Talisay Landing

CEBU, Philippines - Mga karsada nga agian sa parada sa kasaulogan sa Takas sa Talisay ug ang lugar diin ipahigayon ang programa higpit nga bantayan sa kapolisan.

Ang siyudad magsaulog sa ika-68th nga Takas sa Talisay karong Marso 28, 2013 adlaw’ng Martes. Si Talisay City Police Station officer-in-charge Elmer Lim nagkanayon kini nga ang kapolisan motabang sa pagmando sa trapiko.

Gawas niini ang mga karsada diha sa barangay Dumlog paingon sa barangay Poblacion nga agianan sa parada dunay mga polis nga ipakatap.

Ang palibot sa landing shrine sa barangay Poblacion higpit kining bantayan ug dunay mga force multiplier ang ipakatap usab nga motabang isip mga crowd control.

Sa milabay’ng mga tuig nabantayan nga daghan ang modagsang mga tawo diha sa shrine atol sa kasaulogan aron motan-aw sa mga programa ilabi na gyud sa re-enactment diin sama sa tinuod nga giyera tali sa mga sundalong Hapon ug mga Pilipino.

Ang baybayon sa Poblacion dapit sa shrine dunay mga eksplosibo nga ipamutang ug pabuthon kini kintahay bomba ug mga buto-buto sa armas.

Ang mga sakop sa Philippine Navy, Philippine Army, Philippine Air Force ang lakip usab sa re-enactment.

Sila maoy mo set-up sa presentasyon sa re-enactment diin dunay Navy gunship ang gamiton ug chopper sa Philippine Airforce.

Dunay mga Philippine Navy Seal ang lakip sa re-enactment diin mao kintahay mopahigayon og clearing sa lugar una modunggo ang mga sundalong Amerikano. (BANAT NEWS)