3,100 ka punoang marijuana gipanglarot

CEBU, Philippines - Nagtuo ang kapolisan sa dakbayan sa Danao nga daghan pa nga mga luna sa yuta  sa bukirang bahin  sa maong  dakbayan nga  gitanoman  og   marijuana pinaagi  sa wala  hiilhing grupo sa mga tawo.

Kini  human  madiskubrehi sa team sa kapolisan  nga gipangulohan ni Inspector Romeo Caacoy   ang  usa ka  plantasyon  sa marijuana   didto  sa   sitio Taliwad-an, barangay Llangusig sa    maong dakbayan sa miaging  buntag. Sumala  ni  Insp. Caacoy  nga  mitungas  sila  ngadto  sa Taliwad-an  niadtong  higayona  kay  may  isilbi  silang  warrant  of arrest  sa usa ka  dakponon  sa maong  lugar.

Apan  samtang  naglakaw  sila  sa dalan  nasigpatan  nila ang  plantasyon  nga  gitanoman sa mikabat  og  3,100 ka pulos  na  hamtong  nga  mga punoan   sa marijuana.   Si PO2 Roselo Campo  sa kapolisan  sa Danao Police  Station  miingon nga si Catalino  Baldapan nga nalutsan og warrant of arrest nga giluwatan ni  Judge Edito  Enemesio sa Branch 25 sa Regional Trial Court nga nagbase sa maong dakbayan, maoy tuyo sa kapolisan aron silbihan  sa maong warrant. Dugang pa niya  nga gituohan nila ni Insp.  Caacoy   nga  malagmit  nakamatikod ang suspetsado sa ilang pag-abot busa  nakaikyas  dayon  kini  pahilayo sa maong dapit. Busa  wala  sila  maglangan  gihurot  dayon  og  larot  ang  maong  mga  tanom  nga  illegal.

Sa pagkakaron  ang  maong  mga  linarot  ilang  gideposito sa ilang  buhatan  samtang  gipanid-an  kun  kinsay  tag-iya  sa maong  plantasyon. (WC)(BANAT NEWS)