Priso kaslon ugma
CEBU, Philippines - Usa ka piniriso sa Talisay City Jail ang gikatakdang magpakasal sa iyang uyab karong umaabot Domingo sa buntag. Si SJO4 German Sanguensa mibutyag nga si Mark Joseph Balaga, 26-anyos nga taga dalan Cabalan, barangay Poblacion, dakbayan sa Talisay mipadangat og hangyo niadtong Pebrero 3, 2013 ngadto sa ilang Jail Warden nga si Chief Inspector Gil Inopia nga buot kining magpakasal sa iyang uyab.
Gibutyag ni Sanguensa nga si Balaga napriso kini sa TCJ niadtong Septiyembre 17, 2012 tungod sa kasong pagpatay o murder.
Si Balaga ug ang uyab niini kaslon diha sulod sa TCJ ubos sa sibil nga seremoniya kinsa si Mayor Socrates Fernandez maoy mokasal kanila. Apan wala pa mobutyag si Balaga kung kinsay ilang Padrino ug Padrina sa ilang kasal. Matud usab ni Sanguensa nga si Balaga ug ang uyab niini daan nang dunay relasyon sa wala pa mapriso si Balaga. Ang uyab ni Balaga dili usa ka inmate ug magkanunay kining mobisita niya diha sa TCJ.
Si Sanguensa nagkanayon nga si Balaga ug ang uyab niini maoy ikaduhang kaslon diha sa TCJ.
Niadtong tuig 2007 duha ka mga priso diha sa TCJ kinsa parehong dunay mga kasong kalambigitan sa ginadiling drugas ang gikasal.
Hinuon ang duha nagkapuyo na duna nay mga anak sa wala pa sila mangapriso. (BANAT NEWS)
- Latest
