Abellanosa patubagon sa petisyon batok niya

CEBU, Philippines - Gimandoan sa Malacañang  si Konsehal Rodrigo Abellanosa  sa pagtubag  sulod  sa 15 diyas  human niya  kini  madawat, kalabot sa petisyon  nga gipasaka  batok kaniya  gumikan   sa giingong  pagpahimus   niya  sa scholarship  program  sa kagamhanan  sa  dakbayan  sa Sugbo.

Ang mando  nga pirmado  ni Undersecretary Ronaldo A. Geron,  sa Discipline Office  sa Office of the President  sa Malacañang nga gipetsahan og Enero 31, 2013  mibase sa Section 1, Rule 4  sa Administrative Order No. 23    nga  nagpatuman  sa maong  mando.

Sa samang  higayon  gimandoan  usab  si Abellanosa  nga  mohatag  siya  og  kopya sa iyang  tubag  ngadto  sa kihante  nga  si manlalaban Aristotle B. Batuhan kinsa  miakusar  sa respondente  nga  nakalapas  sa  RA No. 6713 gumikan  sa giingong  subrang  pamintaha  niini sa mga kontrata   nga balor og  P100 milyones  bahin  sa   scholarship program  sa kagamhanan  sa dakbayan  sa Sugbo   nga gi-entrahan  ni Abellanosa. Sa petisyon  ni  Batuhan,  kini  miakusar  nga dili makiangayon  ang  gihimo  ni  Abellanosa  tungod  sa pagpahimulos  niya  sa kahigayonan  isip  konsehal  sa  dakbayan  sa Sugbo  ug  sa samang  higayon tag-iya  ug  presidente  sa Asian  College of Technology (ACT) diin niya  paeskuylaha  ang   mga  scholar  sa kagamnhanan.

Gisuwayan  sa Banat News  og  kontak  si Abellanosa kagahapon  aron  makahatag  sa iyang  pamahayag  kalabot  niini  apan napakyas  kay  wala  siya  makontak.

COA giawhag Abellanosa ipa-audit

Samtang  giawhag  ni  Batuhan ang Commission  on Audit (COA)  sa pagsusi  niining  katibuk-ang kinitaan ni Abellanosa  sa unang  tuig  sa pagpatuman  sa nahisgutang scholarship program   nga mikabat  og P313,160,000.00.

Kini  tungod  kay   nasuta  ni  Batuhan  nga  tungod  kay  si Abellanosa  maoy chairman  sa scholarship committee  sa konseho  sa dakbayan  ug  tag-iya  sa ACT, nasuyop  niini  ang  mikabat  og 15,658 ka  mga scholar , nga labaw  og  katunga o 50 porsento  sa tanang  mga scholar  nga  nagpa-enroll  sa lain  pang  18 ka  mga akriditadong  eskuylahan  sa scholarship program  sa kagamhanan, nga tataw  kaayong  usa ka  pamintaha, matud pa ni Batuhan.

Ang  suwat  ni  Batuhan  nga  gipadangat  ngadto  kang  Chairman Ma. Gracia Pulido Tan   sa ulohang  buhatan  sa COA  sa dakbayan  sa Quezon  nga gipetsahan  og  Pebrero 4, 2013 iyang  gipasusi  kun makatarunganon  ba  nga  tungod  lang  kay si Abellanosa usa ka konsehal  ug chairman  sa scholarship committee mamintaha  sa ubang  mga  tag-iya  sa eskuylahan  nga  unta  ang  kuwarta  nga  buhis  sa katawhan  dili  man angayang  solohon  pagpahimus  sa  mga  opisyal   sa goberno. Gipahinumdom  ni Batuhan  ang  Daang Matuwid program    ni  Presidente Benigno Aquino III  kun nasubay  pa ba  sa  matuwid  na daan  ang  gihimo  ni Abellanosa.

Matud  pa  ni  Batuhan  nga  ang  pagburot  sa kinitaan  ni  Abellanosa naggumikan sa  tag-P10 mil  nga  gigahin  sa kagamhanan  sa matag  scholar  o  matag  estudyante  nga mograduwar  sa  high  school  nga  iya  sa goberno, matag  tuig  diin  ang  mga  estudyante  o scholar  nga taga  bukid  may  dugang  pa nga tag-P1,000 nga allowance. (BANAT NEWS)