Pagnihit sa karne nakapabalaka sa taga Talisay

CEBU, Philippines - Gikabalak-ang  mokibra  ang kita sa ihawan sa Talisay tungod sa kakuwang sa suplay sa  maihaw  nga  mga  hayop matud ni City Veterinarian  Santiago Hortel.

Si Hortel nga nahinabi sa Banat News mibutyag nga niadtong buwan sa Disyembre 2012 mikabat   og kapin   sa P1.4 milyones  ang kita sa ihawan sa Talisay.

Apan niining buwana   Enero ug sa mga mosunod pang buwan  napanglantawan  nila  nga  mokunhod  ang kita sa ihawan tungod   kay  dyutay  kaayo  ang  dunggo  nga  mga  hayop  gikan sa Mindanao. Gibutyag ni Hortel nga ang mga negosyante og  karneng baboy naproblema   usab kay  kun  walay  baboy  nga  muabot  dinhi sa Sugbo  gikan  sa Mindanao, wala  sila’y  ikapaihaw  busa  wala  sila’y  ikatinda  nga  karne.

Gibutyag sa city veterinarian nga kasagarang baboy nga gisuplay sa mga merkado   sa Talisay  naggikan  sa mga baboyan  sa  Mindanao.

Apan  dihang  gisantako  sa  bagyo  ang  Mindanao sa miaging buwan naapektohan   usab  ang  mga  produkto  sa kaumahan  didto  ilabi  na  ang  mga kahayopan sama  sa baboy  ug  uban  pa.

Sa  miaging  tuig  adunay  200 ka mga baboy ang maihaw  matag  adlaw gikan  sa Lunes hangtud  Biyernes   samtang sa Sabado ug Domingo mokabat ngadto sa 250  ka  baboy ang maihaw  sa maong  mga  adlaw.  Ang ihawan  modawat  og P208   nga bayad  sa matag usa ka baboy nga ihawon, wala  una  kini  mangihaw  karon  og  mga  baka   ug kabaw.

Sa laing bahin, matud ni Hortel nga nangandam na usab sila karon tungod kay   sa  unang semana sa Abril gitakdang mo-inspection   na  usab ang National Meat Inspection Services (NMIS) sa ihawan.   Ang ihawan sa Talisay  giklasipikar  nga  ubos sa  Double A accreditation   nga  makabaligya  na  kini  og  karne  bisan  ngadto     sa  nagkalainlaing  bahin  sa rehiyon  7. (BANAT NEWS)