Ex-convict giulo pagpusil patay

CEBU, Philippines - Namatay  ang usa ka kanhi binilanggo sa Lapulapu City Jail   human  kini pusila sa ulo samtang  natulog sa lamesa sa  gawas sa  ilang  balay  sa sitio Santa Maria, barangay Pusok, dakbayan sa Lapulapu kagahapon  sa  alas 3:00 sa kaadlawon. Si Senior Inspector Zenaido Pastorfide Jr., hepe  sa homicide section sa kapolisan sa maong dakbayan miila sa namatay nga mao si Roylord Jesson  Durano,  26, ulitawo, nga nagpuyo sa maong dapit. Matud pa ni Pastorfide nga  giasoy  kanila  ni Emma,   inahan   sa biktima   nga  natulog  si Roylord  sa lamesa  sa kilid    sa ilang balay    ug  nianang  pagkakaadlawom  nahipugwat  na lang  silang  tanang  nangatulog  sa sulod  sa balay     dihang  nadungog  nila  ang  lanog nga buto sa armas.

Gisusi  dayon  nila  kun  kinsay  nagpabuto  apan nakurat  na lang  silang tanan  dihang  nasuta  nila  nga  si Roylord  nagbuy-od   na  sa gihigdaang  lamesa  niini  kilid  sa ilang  balay   nga  nagkadugo  na  ang  tibuok  lawas    gumikan sa samad  pinusilan  sa ulo  sa biktima.

Gihatud  dayon  sa mga tagtungod  ang  biktima  ngadto  sa   Lapulapu  City  Hospital  diin  kini  ideklarar  nga  patay  na  sa paghiabot  didto. Si Senior Inspector Pastorfide  miingon nga sa ilang nahipos nga kasayuran gikan sa inahan sa namatay  ilang nasuta nga dili pa usab kini dugay nga nakagawas sa bilanggoan sa Lapulapu City Jail   si  Roylord  sa kaso nga homicide nga nahitabo sa tuig 1995.

Dugang pa niya gawas nga gikan kini sa bilanggoan daghan na usab kini og gikaaway   sa ilang  lugar ug   gani  nakasugat  kini  og  sinumbagay   batok  sa iyang  silingan   niadtong Disyembre  sa miaging tuig. (BANAT NEWS)