Mag-uuma giluba patay sa gikainom nga higala

CEBU, Philippines - Patay ang   usa ka  mag-uuma human kini ligira  og  dunggab  sa iyang higala nga gika-inom  didto sa Sitio Pangilatan barangay Inayagan siyudad sa Naga niadtong Biyernes sa kaadlawon.  

Ang biktima mao si Adolfo Tapic, 45 , ulitawo,   nga taga Sitio Balisong, barangay Cantao-an   sa maong siyudad , ug  usa ka mag-uuma.  Samtang ang suspek mao  ra usab ang iyang higala ug  silingan  nga si Julito Bacarro, hingkod ,ug minyo. Si PO2 Gilmer Noval sa Naga City Police   Station mibutyag  sa Banat News   nga  sa  wala  pa  ang  maong  hitabo  ang biktima ug ang suspek nagkasabot   nga  mag-inom.

Apan   dihang nangahubog na  nagsugod na sila og sumpaki  hangtud nga nag- binuyboyay   na nga misangpot  sa  ilang panag away.

Ang suspek nga wala makapugong sa iyang kalagot milanit sa iyang  kutsilyo  nga giluklok  sa hawak  dayun  gidunggab  sa nagkalainlaing  bahin  sa  lawas  ang biktima   ug naglisud  na  sa  pagpanagang  ang naulahi.

Human  mabulit  sa  samad  ang  kalawasan  gikan sa mga kamot, kilid, tiyan ug  uban  pang  bahin sa lawas  nawad-an  na  og  umoy ang  biktima  nga nagligid  sa yuta  ug  ang katapusang    duslak  sa  suspetsado  gitumong  sa kuto-kuto  sa  biktima  nga maoy  nakabugto  dihadiha  sa kinabuhi  niini. Ang suspek daling midagan pahilayo ug wala na kini maabti sa miresponding mga polis nga gipangulohan ni SPO1 Arturo Andales ug mga kaubanan.

Samtang ang biktima gisuwayan   og hatud sa  mga tagtungod  niini  ngadto sa Minglanilla District Hospital apan gideklarar sa mga doctor nga dead on arrival kini.

Ang kapulisan padayun pa sa ilang hot pursuit operation pagsikop sa  nakasibat nga suspek. (BANAT NEWS)