Templete ni San Pedro Calungsod i-preserbar sa siyudad
CEBU, Philippines - Nadesisyonan sa kagamhanan sa Cebu City nga i-preserbar ang San Pedro Calungsod Templete nga nahimong saksi sa makasaysayanong National Thanksgiving Mass niadtong Nobiyembre 30, 2012 nga gipahinungod sa pagkahimong santos ni San Pedro Calungsod.
Si Cebu City Mayor Michael Rama mihulma og Management Committee nga gitahasang maoy mo-preserbar sa templete diha sa South Road Properties nga himuon na lang nga historical park.
Usa ka Executive Order ang gipagawas ni Rama nga naghimo sa Management Committee nga langkuban sa mayor, representante sa Chairman, usa ka representante Archdiocese of Cebu isip co-chairman ug ang South Road Properties Manager, city engineer, representante sa Cultural and Historical Affairs, representante sa Cebu City Tourism Commission ug representante sa Cebu City Police Office isip mga sakop.
Ang maong komitiba maoy mosiguro nga mapreserbar ug ampingan ang maong pasilidad ug matarong ang mga aktibidades nga pagahimuon sa maong dapit.
Matud pang Rama madugang ang templete sa mga makasaysayanong mga dapit dinhi sa Sugbo sama sa Magellan’s Cross nga gi-preserbar sa siyudad ug uban pa. (BANAT NEWS)
- Latest
