9-Buwang mabdos tipi sa bangga

CEBU, Philippines - Patay ang usa ka siyam ka buwang mabdos ug laing tulo ang naangol apil ang anak sa namatay nga nag-edad pa og 4-anyos human sa aksidente sa dalan diha sa National highway sa Barangay Bahay, Sibonga niadtong Domingo sa gabii.

Ang nakalas mao si Glenmar Laude, 25, taga Barangay Candaguit kinsa manganakay karong bulana. Ang mga biktima gidala sa Deiparine Medical Clinic human sila makaangkon og mga kadaot bunga sa aksidete.

Ang mga nangaangol mao sila si Erika Lyn Arnaiz, 4, anak ni Laude; Arnel Sordilla Sonsona, 23, ang driver sa gisakyan nilang motorsiklo ug usa ka Helen Rosales, 39, nga taga Dalaguete.

Ang mga nangaangol nalandig usab sa samang tambalanan apan gumikan sa kadaot nga ilang nahiaguman gibalhin sila sa Don Vicente Sotto Memorial Medical Center sa Cebu City.

Base sa imbestigasyon sa kapolisan, nanakay ang manag-inahan sa motorsiklo ni Sonsona padulong sa barangay Poblacion niadtong tungora apan dihang naabot sila sa nahitaboan nadumbolan niini ang Suzuki minivan (JEE-554) nga gimaneho ni PO2 Jephthah Bolongaita Jumawan, 37, nga taga Batinguel, Dumaguete City, Negros Oriental.

Si Jumawan nadestino sa Regional Training School (RTS)-7, ug padulong na unta sa siyudad sa Sugbo niadtong tungora pagkahitabo sa aksidente.

Luwan sa maong minivan sila si Rosales, Jessa Mae Milar, 23, Ermie Aparici, 15, Ernamie Milar, 19, Ruel Euge Rosales, 9, ug Anselmo Caingles, 22, pulos mga taga Dalaguete.

Matud pa ni SPO3 Marlon Cortes, sa Sibonga Police Station, si Sonsona padulong na sa eskina dihang naigo sila ni Jumawan ug tungod sa kakusog sa pagbangga nalagpot ang mga sakay sa motorsiklo.

Malinawong mitahan sa iyang kaugalingon si Jumawan human sa aksidente ug gitanggong na karon sa karsel sa Sibonga police station alang sa pagpasaka og kasong reckless imprudence resulting in multiple homicide and multiple physical injuries.

Samtang buwag nga kasong driving without license ang ipasaka batok kang Sonsona tungod kay wala diay kini lisensya. (/EIM) (BANAT NEWS)