Taga Consolacion nanumpa sa One Cebu
CEBU, Philippines - Ang kaliboan nga sakop sa Movement for Progressive Consolacion (MPC) nagtapok sa dakong hawan sa barangay Poblacion Occidental ug subli nga nanumpa nga magpasakop sa One Cebu Party ug sa pagsuporta sa mga kandidato niini.
Si kanhi mayor Avelino Gungob Sr. nga maoy chairman sa maong kahugpongan maoy nanguna sa ilang march rally gikan sa 21 ka barangay ug nagtapok didto sa plaza sa lungsod nga nagdala og mga placard ug mipatuy-aw sa ilang tingog pagsuporta sa gisuspenso nga gobernador Gwendolyn Garcia.
Si Gungob nga maoy standard bearer sa One Cebu Party ug kandidato sa pagkamayor sa maong lungsod maoy ikaatbang ni Incumbent Mayor Teresa Alegado nga magpasubli sa iyang ikaduhang termino ubos sa Liberal Party ni Presidente Benigno Simeon Aquino III.
Gitambongan usab ang maong kalihokan ni kanhi 6th District Congresswoman Nerissa Soon-Ruiz nga maoy kandidato sa One Cebu Party ug ikasakbang usab ni Kongresista Gabriel Luis “Luigi” Quisumbing nga magpasubli sa maong katungdanan sa umaabot nga piniliay
Bisan kun wala makatambong ang gobernador sa maong kalihokan apan nakapalanog gihapon kini sa iyang mga pulong pinaagi sa video footage nga gipakita sa dakong screen ug nakapahugyaw sa mga tawo nga nanambong dihang giasoy niini ang kasamtangan niyang kahimtang.
Si Incumbent Consolacion Municipal Councilor Illuminido Alin nga nahinabi sa Banat News miingon nga dako kaayo ang iyang kahingangha sa gipakitang suporta sa ilang mga sakop sa MPC nga naghago sa pagpanglakaw gikan sa ilang tagsa-tagsa ka mga barangay sa kaikag nga makatambong sa gipasiugdahan nilang kalihokan.
Ang secretary general sa One Cebu Party nga si Cebu 3rd District Congressman Pablo Garcia maoy mipapanumpa sa mga sakop sa MPC sa ikaduhang higayon
Ang iyang tandem nga si Ramon Boboy Durano 1V mitambong usab sa maong kalihokan uban niya ang basketbolista nga si Elmer Cabahug kinsa kandidato sa One Cebu Party sa pagka board member sa ikaunom nga distrito sa Sugbo.
Si Congressman Garcia maoy kaatbang ni kanhi Cebu City Councilor Hilario Davide III sa dakbayan sa pagka- gobernador ubos sa Liberal Party ug tandem usab niya si Acting Cebu Governor Agnes Magpale. (/WC) (BANAT NEWS)
- Latest