Zambo midawat sa pinaskohan alang sa VMLP

CEBU, Philippines - Pormal  nga  gidawat  ni Vice  Mayor Arlene Daydee Zambo  sa dakbayan  sa Toledo  ang P2 milyones nga  pinaskohan   nga gihatag  ni  Governor Gwendolyn Garcia alang  sa   mga sakop sa Vice Mayors League of the Philippines (VMLP) Cebu Chapter. Ang  maong  pinaskohan gitunol  ni  Garcia  atol sa Christmas Party  nga  gipahigayon  sa VMLP  didto sa Hotel Elizabeth sa may Archbishop Reyes siyudad sa Sugbo  sa miaging gabii.

Si Zambo   nga  maoy chapter president sa VMLP Cebu Chapter  mapasalamaton kaayo  sa gobernador. Kauban  sa  tanang  opisyal  sa VMLP Cebu Chapter  gipahayag  ni Zambo  nga  dako  kaayo  og  ikatabang  sa maong  grupo  ang  pinaskohan  nga  nadawat  nila sa gobernador.

Matud  niya  nga  nahinangop  kaayo  sila  sa pagtambong  sa gobernador  sa ilang  party  uban  usab  sa mga  opisyal  sa One Cebu Party.

Matud pa ni Zambo  nga ang  maong  kantidad gamiton  sa ilang organisasyon  sa pagtukod og mga school building  sa mga kalungsoran nga mapilian unya  nila.

Sa nahisgutan nga okasyon gihatagan sa VMLP og tagsa ka plaque of appreciation ang upat ka mga bise mayor  nga motapos na sa ilang tulo ka tuig nga panerbisyo sa sunod tuig. Kini naglangkob nila ni Minglanilla Vice Mayor Elanito  Lani Peña,  Samboan Vice Mayor Rogelio Capa, Badian Vice Mayor Fructuoso Caballero ug VMLP Cebu Chapter Secretary Tudela Vice Mayor Clint Maratas. Samtang  mitunol  usab  sila si Zambo kang Gobernador Garcia  og special award and recognition gumikan sa kanunay niya nga abag  sa mga programa sa VMLP.

Gitataw   sa gobernador  nga gilibot  niya  ang  lalawigan  sa Sugbo  sa pagpanghatag  og cash assistance sa mga na-apektohan sa bagyong Pablo ug pagtambung sa South Qualifying Race sa Governors Cup  A Horseshow and Competition, apan labaw  niyang  gihatagan  og  higayon  ang  pagtambong  sa malipayong okasyon sa kahugpongan  sa VMLP. (WC)(BANAT NEWS)