Jack Jakosalem na-impeksyon sa utok apan hinayhinay na nga naka-recover

CEBU, Philippines - Human sa duha ka buwan kapin nga pagpakahilom, mitingog na ang asawa ni Cebu City Integrated Traffic Operations Management (Citom) chairman Sylvan “Jack” Jakosalem nga si Sharon kalabot sa kahimtang sa iyang bana nga nagpabilin karon sa Intensive Care

Unit (ICU) sa Chong Hua Hospital.

Nagkanayon si Sharon nga arang-arang na karon ang kahimtang sa iyang bana ug dili tinuod ang mikatap nga mga hungihong nga naglisod ang kahimtang niini.

Giangkon hinuon ni Sharon nga nag-agi og operasyon si Jack ug padayon kini nga giobserbahan sa mga doktor.

Dugang pa niya nga gipili nila nga magpakahilom gumikan kay gusto nila nga himuong pribado ang uban pang mga detalye sa kahimtang sa kanhi konsehal sa dakbayan.

Samtang ang usa sa mga nag-atiman ni Jack nga si Dr. Toom Vatanugol nagkanayon nga niadtong miaging tuig natakbuyan sa maong parasitiko si Jack ug natambalan apan sa unang bahin sa buwan sa Septiyembre karong tuiga mibalik kini ug ang utok na niini maoy giatake hinungdan sa grabeng paglabad sa ulo sa kanhi konsehal.

Usa ka talagsaong sakit ang nakuha ni Jack nga gitawag og Neurocysticercosis.

Usa kini ka sakit gikan sa Daenia solium, kon pork tapeworm nga makuha sa baboy nga wa matarong pagluto. Mao nga pahimangno karon ni Dr. Toom nga seguraduong naluto og maayo ang inyong kan-on nga karne aron malikayan ang maong sakit.Nagkanayon ang doctor nga dili niya matino kung kanus-a hingpit nga maulian si Jack sanglit padayon gihapon ang medikasyon niini sa ICU.

Apan gipahibalo niini nga  inanay nang naka-recover ang  kanhi konsehal human sa duha ka operasyon niini. Gani, malihok na ni Jack ang nagkadaiyang bahin sa iyang lawas, ug maka-respond na kini kung tawgon.Kandidato si Jack pagka-konsehal sa north district ubos  sa Team Rama apan si Sharon misaysay nga dili pa siya mohatag og komento kalabot sa posibilidad nga siya ang mohulip sa kandidatura sa iyang bana.

Matud pa niya nga dili siya gusto maghisgot og politika karong panahona gumikan kay ang pag-atiman sa iyang bana maoy iyang prayoridad.

Dili usab kahatag og detalye si Mayor Michael Rama kalabot sa posibilidad nga hulipan si Jakosalem sa iyang line-up apan iyang gipaneguro nga duna gyu’y Jakosalem sa iyang grupo. (EIM) (BANAT NEWS)