3 patay, 34 angol sa bangga

CEBU, Philippines - Tulo ang patay ug laing 34 ang naangol human magkabangga ang bus pasaheroan ug usa ka pribadong awto diha sa barangay Dakit sa siyudad sa Bogo kagahapon sa alas 2:45 sa kaadlawon.

Ang nakabangga mao ang Autobus nga dunay sakay nga 53 ka pasahero nga gimaneho ni Jose Rubio Rosacenia,36, taga barangay Agujo lungsod sa Daanbantayan samtang ang drayber sa Toyota Corolla Altis mao si Aldrin Branzuela Presbetero, 43,  ug taga brangay Maya Daanbantayan.

Matud ni PO3 Edwin Dignos, ang traffic investigator sa Bogo City Police nga ang bus paingon sa siyudad sa Sugbo nga direksiyon samtang ang awto sa sugat nga direksyon.

Ang mga namatay nga pasahero mao sila si Juan Ere Baydal,50,  taga Batad, San Remegio; Roy Gesta Tampus, taga Poblacion, San Remegio ug Dennis Garcia Gasic,36, taga Anapog, San Remegio.

Matud ni Dignos 36 ra ang nalista nga naangol gikan sa 53 ka pasahero tungod kay ang uban niini  wala magrabihi ug wala na magpa-blotter.

Sumala pa ni PO3 Dignos subay sa iyang imbestigasyon nikawat sa pikas linya ang bus pasaheroan maong ang duha nagkabangga.

Sa interbyu kang Rosacenia sa Radyo5 kagahapon sa buntag kini mibasol sa usa ka dakong trak nga nag-parking sa daplin sa dalan nga iyahang gilihayan apan sa iyang pagkawat sa pikas lane mao say pagbutho sa maong awto nga iyang nadasmagan.

Sa pagsukitsukit ni Dignos sa drayber mitug-an kini nga nasuwawan siya sa headlights sa maong awto ug bisan og nagsige na siya og high and low sa iyang headlights.

Tungod sa kakusog sa impact nalahos og bangga sa punoan sa lubi ang bus nga maayong pagkatumba sa maong kahoy ug nidaro pa  sa waiting shed ug didto matagak sa kahoy nga kamansi sa kilid una pa natugpa sa katubhan ang bus.

Ang mga naangol gidali og hatud sa Verallo District Hospital sa Bogo City samtang ang tulo nga namatay nakaangkon og grabeng kadaot sa mga ulo ug liog.

Dunay upat ka pasahero ang matud pa ni Dignos nga anaa sa kritikal nga kahimtang ug gilahos sa tambalanan dinhi sa dakbayan sa Sugbo nga mao sila si Jonathan Masbate, 32, taga Kalkalan, San Remegio; Rolando Paclipan, 60, taga Busogon, San Remegio; Avelino Lingeuto, 57, Batad, San Remegio; ug Reynaldo Beracess, 44,  taga Bayo, San Remegio.

Ang drayber sa Autbus natanggong na karon sa karsel ug gitakdang pasakaan og kaso karung adlawa samtang ang drayber sa awto nagpatambal kay naangol usab sa hitabo. (EIM) (BANAT NEWS)