Miuwang sa away giluba angol

CEBU, Philippines - Samaran sa buko-buko ang usa ka 60  anyos  lalaki   human kini  dunggaba sa  asawa  sa  magtiayon  nga  iyang  gibadlong  kay  nag-away    didto sa  Sitio Seaside,  Brgy. Pajo dakbayan sa Lapulapu sa milabay’ng gabii.

Ang biktima mao si Benvenido Daño, 60, ug residente sa maong dapit. Samtang ang midunggab   kaniya mao si Analyn Garciano, 39, minyo, ug  silingan  sa biktima. Sa imbestigasyon sa kapolisan nasuta nga  sa  wala pa  ang  pagpanunggab nagkalalis   ang  suspetsado  ug  ang  bana  niini  nga  si  Jacinto Rosales   busa giuwang  sa biktima. Apan  siya  naman  hinuon  ang  giatubang  sa suspek  ug  maoy  gihansakan  sa kutsilyo  nga  dala  niini.

Ang  biktima  nga  wala  makabantay    nasabak sa buko-buko  kay  nagtalikod  man  kini dihang  gidunggab  sa   suspetsado.

Gihatud  dayon  kini  sa  iyang  kabanay  ngadto  sa Lapulapu City hospital, samtang  nasikop  usab  dayon  si Analyn sa  miresponding  kapolisan ug gibalhug   dayon  sa   detention cell sa Lapulapu City Police Office detention cell.Samtang  giandam  usab  dayon  sa biktima  ang  kiha  nga  iyang  isang-at  batok  sa suspetsado.( /WC) (BANAT NEWS)