GibIyaan sa asawa naguol naghikog

CEBU, Philippines - Patay na nga nakit-an ang usa ka bana   nga  naghikog  tungod  kay gibuwagan sa iyang asawa sulod sa pinuy-anan niini didto sa Sityo Kabito-onan, barangay Pundol, lungsod sa Balamban niadtong Biyernes sa alas 10:45 sa buntag.

Ang  nagtubok  sa iyang  kaugalingon  mao si Euberto Delator, 63 ,  kinsa gibiyaan  sa asawa, nga molupyo sa maong lugar.

Si SPO1 Julius Obanana , desk officer sa Balamban Police  Station   mibutyag  sa Banat News   nga  si Rutchell  Delator,  34,  anak   sa naghikog   maoy nakadiskobri sa patay’ng lawas sa  iyang  amahan  nga nagbitay  na  sulod  sa ilang  balay  kansang  liog  gibuliboran og  electrical wire samtang  ang  pikas  tumoy  niini gigaid  sa  sagbayan  sa ilang  balay.

Gitabang  dayon kini uban  sa mga silingan  apan  namugnaw  na  ang  tibuok   lawas  ug  gikataho nila  nga patay  na  gyud  kini.

Nasayran  sa kapolisan  gikan  sa  mga kabanay  niini nga taud- taud na kining nag-antos sa nervous breakdown ug  gani  kanunay lang kuno  nga magyawyaw ug moreklamo tungod kay aduna  kunoy  mga tawo   nga magpunay  og   pangita  kaniya kay gusto  siyang patyon.

Giingon  nga  nagsugod ang  balatian niini human biyai sa iyang asawa ug   siya na lang usa ang nagpuyo sa ilang balay human  mangaminyo  ang iyang mga anak.

Wala  usab  hinuon  ikabutyag  sa kapolisan  ang  hinungdan  nganong  gibiyaan  kining  naghikog  sa iyang  asawa.

Ang nasiguro  lang  sa mga  paryente  mao  nga  ang kaguol  niini  nga gibiyaan  sa asawa  maoy  nakapaaghat  sa iyang  pagpakamatay  sa kaugalingon. (WC) (BANAT NEWS)