Mga kabanay sa nakalas sa JeganS bus nahatagan sa insurance

CEBU, Philippines - Hingpit nang nadawat sa pito ka pamilyang namatyan sa nadisgrasyang Jegans Bus diha sa barangay Don Andres Soriano sa syudad sa Toledo ang insurance nga gikan sa Passenger Accident Management Insurance Agency Inc. (PAMI) diha sa Land Transportation Franchising and Regulatory Board-7.

Ang mga nakadawat mao silang Andriano Limbang Jr. ; Antonio Pajelleno; Nida Cañabano; Analy Umba; Cherry Baraquil; Paterno Nillama ug Ariandi Godez kansang mga kabanay naapil sa mga nakalas.

Ang mga kabanay nakadawat og tagsa-tagsa ka cheke nga nagkantidad og tag P35 mil kay human na sila unang nakadawat sa P40 mil isip pasiuna sa insurance sa pagkadisgrasya.

Usa sa mga nakadawat nga si Analy, wala makapugong sa iyang kaugalingun ug nakahilak gayud kini bisan sa daghang tawo.

Matod pa ni Analy nga wala na siya masayod karon kun unsa ang iyang buhaton sa iyang mga anak nga gagmay pa kaayo.

Gibutyag usab ni Analy nga naglibog siya kun unsa ang iyang pagabuhaton aron mabuhi sila sa iyang mga anak tungod kay ang namatay niyang bana nga si Ereneo lang ang ilang gisaligan apan karun susama siya og nahugno tungod kay wala man siyay trabaho.

Gihulagway ni Analy nga ang kantidad nga ilang nadawat gikan sa LTFRB dili makabayad sa pagkawala sa iyang bana, apan mapasalamaton gihapon siya tungod kay aduna silay ika-abante sa ilang inadlaw nga panginahanglanon.

Samtang si LTFRB Chairman, Jaime Jacob mibutyag nga bisan tuod ug dili igo ang ilang gihatag nga kwarta apan ilang gihimo ang ilang mahimo aron makatabang sa mga pamilya.

Gawas niini, napanglantawan ni Jacob nga bugtong nilang mahimo alang sa mga pamilyang nawad-an ilabi na kadtong adunay mga anak mao lang ang pag-refer kanila ngadto sa buhatan nga hingtungdan.

Samtang gihulagway usab ni Ryan Benjamin Yu ang chairman sa Cebu Confederation of Transport Operators and Drivers Association Incorporated (CCTODAI)  dunay mga pasaherong gusto gyud og mga kaskaserong mga drayber maong ang mga drayber usab  magpakusog na lang pud aron adto kanunay manakay sa ilang mga bus. (BANAT NEWS)