Subling gidili ang pagpamaligya og pabuto

CEBU, Philippines - Subling gipahibalo sa mga awtoridad ang pagdili sa pagpamaligya og bisan unsang matang sa paboto sa dakbayan sa Mandaue karong nagsingabot na sab ang Pasko ug Bag-ong Tuig.

Kini maoy gibutyag ni Fire Chief Inspector Rolando Orbita, Fire Marshal sa maong dakbayan.

Gihimo kining maong lakang gumikan sa disgrasyang nahitabo kaniadto sa Ouano Avenue , Reclamation Area nga mikalas og usa ka kinabuhi ug 17 ka tawo ang naangol human miulbo ang mga tindahang namaligya og pabuto.

Matud ni Orbita, lisod gyud pugngan ang publiko sa pagpaboto busa mahimo ra silang mopalit sa bisan asang tindahan og paboto sama sa silingang dakbayan sa Lapu-lapu sanglit sa Mandaue ra gidili ang  pagpamaligya niini.

Apan kun adunay masakpan nga mamaligya sa maong lugar, sakmiton kini dayon ug pamultahon.

Dugang sab ni Orbita nga mopahigayon sila og kampanya kabahin sa luwas nga paggamit sa paboto ug pasidan-an nila ang katawhan sa mga angay’ng buhaton sa pagsaulog sa Pasko ug Bag-ong Tuig.

Samtang lakip sa ilang ipakatap nga impormasyon mao ang luwas nga paggamit sa mga Christmas lights nga usa sa mga hinungdan sa sunog. (BANAT NEWS)