Giluba og botelya kritikal
CEBU, Philippines - Kritikal ang kahimtang sa usa ka lalaki human kini pusposi og basiyo sa botelya dayon gidunggab sa ilok didto sa Purok Caimito, sa barangay Canjulao, dakbayan sa Lapulapu sa miaging gabii.
Ang biktima mao si Dancar Cabasa, 29, minyo, nga nagpuyo sa maong dapit, samtang ang suspetsado mao si Rico Dungog, 46, minyo usab nga silingan sa biktima .
Si PO2 Jude Quiroben sa homicide section sa kapolisan sa maong dakbayan nga nahinabi sa Banat News miingon nga nag-inom ang biktima ug ang suspetsado sa usa ka tindahan nga nahimutang usab dili layo sa ilang mga balay.
Sa paglabay sa pipila ka oras dihang nangalasbag na nasaghiran ang tiil sa biktima sa batang 3 anyos nga nagduwaduwa sa maong lugar ug sa kasuko niini gidukol ang ulo sa bata.
Hinungdan nga gibadlong kini sa suspetsado apan misamot ang kasuko sa biktima nga maoy sinugdanan sa ilang panaglalis.
Gumikan kay pulos na kargado og gasoline nga bino ang utok dali kaayong misilaob ang ilang away apan ang suspetsado kinsa milikay sa dautang mahitabo mipauli sa ilang balay.
Apan bisan kun nahinanok na kini sa pagkatulog gipukaw gayud sa biktima hinungdan nga misamot kasuko ang suspetsado.
Gumikan sa kainit sa iyang ulo, mipunit kini og basiyo sa botelya ug gihapak ang ulo sa biktima ug dihang nabuak ang maong botelya gihansak kini sa tuong ilok niini.
Nagbuhagay pa ang dugo sa ilok sa biktima nga gihatud ngadto sa Lapulapu City Hospital apan gibalhin usab dayon ngadto sa Vicente Sotto Memorial Medical Center sa dakbayan sa Sugbo.
Ang suspetsado nga nadakpan sa kapolisan human sa maong hitabo temporaryo karong gibalhog sa prisohan sa kapolisan sa dakbayan sa Lapulapu. (BANAT NEWS)
- Latest
- Trending