Bag-ong nanganak gikulata sa banang Pranses

CEBU, Philippines - Usa ka French National ang nagtingkagol karun sa karsel human kini gikatahong nangulata sa iyang kapuyo nga Filipina diha sa ilang panimalay pasado alas-10 sa miaging gabii sa barangay Lahug dakbayan sa Sugbo.

Ang nasikop mao ang 25-anyos nga  French nga lumad nga taga Costa Rica sa nasud sa France samtang ang iyang kapuyo nagpangidaron usab og 31-anyos nga pangalan gipugngan sa Banat News aron panalipdan ang biktima ug iyang anak.

Base sa impormasyong nakuha sa hepe sa kapolisan sa Mabolo Police Station nga si Chief Insp. Enrique Belciña nagsugod ang away sa duha dihang nasakpan sa biktima ang iyang bana nga adunay ka-chat sa online nga laing lalaki.

Tungod niini, mitumaw ang init nga panaglalis nga miresulta sa suspetsado sa pagpangulata sa biktima diin giingong gibira siya sa suspetsado ug gidapatan. "Naa’y bun-og ang bukton sa biktima, sa sige og bira-bira sa suspek while galalis sila," matod pa ni Belciña.

Samtang nasayran usab sa kapolisan nga gihulga sa suspetsado ang biktima ug giingan nga "If you call a police or lawyer, I will kill you and the whole family."

Bisan pa man sa pagpanghadlok sa suspetsado nangayo gihapon kini og tabang sa kapolisan  hinungdan sa pagkadakop sa maong langyaw. Ang suspetsado nag-atubang karun og kasong physical injuries ug grave threat in relation to Republic Act 9262 Anti-Violence Against Women and Their Children Act.

Gibutyag usab ni Belciña nga dili lang kini ang unang higayon nga nadapatan sa suspek ang biktima. Ang biktima niadto lang Oktubre 15 nanganak sa ilang kinamaguwangang anak  nga usa ka babaye. (BANAT NEWS)