Gibadlong kay may armas mipusil sa 2 ka silingan

CEBU, Philippines - Gipangita sa kapolisan ang usa ka tawo kinsa  gumikan  sa kasuko nga gibadlong  sa iyang pagtangkil  og armas de fuego  mipusil sa duha ka babaye nga iyang silingan sa sitio Laray, barangay Pitogo, lungsod sa Consolacion   sa miaging  buntag.

Ang suspetsado nga  wala  pa hidakpi mao si Sozimo  Sumagang, 46 ,  lumad nga taga lungsod sa Carmen sa lalawigan sa Bohol ug temporaryong nagpuyo sa maong dapit.

Si PO1 Adian Balanay sa kapolisan sa  Consolacion nagkanayon  nga si Sumagang maoy suspetsado sa pagpamusil kanila ni Maria Luna Alforque, 40 ; ug Percila Mulo, 40; nga pulos   silingan sa suspetsado.

Sa imbestigasyon nga ilang gihimo  nasuta  nga nasigpatan ni Alforque ang suspetsado nga naglingkod nga nagkaon   sa daplin  sa karsada kansang  gitangkil  nga armas  de fuego  misiwil sa  iyang  hawak.

Busa  gibadlong   ni Alporque uban  sa pagpasabot  nga  supak  sa balaod  ang  pagtangkil  og  armas  de fuego  sa dili  mga  otoridad  sa balaod.

Si  Alforque  giingong  human  og  tambag   ngadto  sa suspetsado  mibiya  kini  nga  nagbagulbol  uban  sa bahad  nga  isumbong  niya  sa kapolisan  ang  suspek.

Si PO1 Balanay midugang  nga  dihang nabati sa suspetsado ang giyawyaw ni Alforque  nasuko kini  nga  misangpot  sa ilang  panaglalis.

Dihang nahutdan  na  sa katarungan  ang suspek uban  sa kapungot  ug kalagot  milanit  sa iyang  armas ug  gipusil  niini  ang biktima kansang  bukton  maoy  gitaroyan  sa bala.

Matud pa ni PO1 Balanay nga ang ikaduhang biktima nga gikan pa nga nagkawos og tubig nga nahiagi  usab  sa maong dapit, ug  walay  kalibotan  sa hitabo,  naigo sa dughan.

Ang  duha  ka  mga biktima  gihatud  dayon  ngadto  sa   tambalanan  sa dakbayan  sa Lapulapu samtang  dali  usab  kaayong  nakasibat  ang  suspetsado.

Sa pagkakaron  padayong  gipangita  sa kapolisan   ang  suspetsado  aron pasakaan  og  kiha  sa sala  niyang  nabuhat. (BANAT NEWS)