Basurang plastic ipapalit sa pabrika

CEBU, Philippines - Usa ka ordinansa nga gipalabang    sa konseho sa dakbayan sa Mandaue nga nag-awhag sa mga pabrika og plastik nga paliton nila og balik ang mga basurang plastik aron masulbad ang pagpasad niini sa kadalanan nga maoy mobara sa tubig sa imbornal ug mosangpot sa mga lunop sa panahon sa ting-uwan.

Ang maong ordinansa nga gipangamahanan ni Konsehal Demetrio Cortes Jr., mipasabot nga ang gipanglabay nga mga plastik   sa kadalanan dako kaayo og gikatampo sa   mga baha sa dakbayan sa matag panahon nga mobunok ang ulan.

Matud pa niya nga nasuta nila kini dihang nanglimpiyo sila sa mga kanal sa dakbayan sa miaging semana diin kagatusan ka sakong plastic ang ilang nahabwa gikan sa mga kanal sa siyudad.

Matud pa sa maong ordinansa ni Cortes nga dili dautan   ang plastic ug labaw sa tanan wala kini sala nga maoy pahamtangan og silot, kay ang may sala niini mao kadtong mga tawong tiggamit niini nga iresponsabli.

Matud pa ni Cortes nga labing mahinungdanon usab nga ang mga pabrika sa plastik mahimo silang nga responsabli pinaagi sa pagpamalit niini aron imbis ilabay, hiposon kini sa publiko ug ibaligya ngadto kanila aron di na makatampo og suliran sa dakbayan.

Dugang pa ni Cortes nga molungtad pa og 1,000 ka tuig nga gidugayon nga madunot ang gipanglabay nga mga plastic ug maoy hinungdan nga dili kini ikapatuyang og labay sa mga tawo sa kadalanan hangtud sa mga kanal.

Samtang si Archetic Florentino Nimor, City Planning and Development officer sa dakbayan mibutyag sa mga tigbalita nga 30 ka mga manhole sa dalan M.C. Briones ilang gilimpiyohan niadtong miaging bulan.

Gitataw niya nga 80 porsento sa ilang nahipos nga basura mga plastik nga maoy nakabara sa tubig paingon ngadto sa sapa gikan sa maong mga kanal sa dakbayan hinungdan sa paglunop sa maong mga lugar. (WC) (BANAT)