Politiko gidasig paghipos sa basura

CEBU, Philippines - Gidasig sa taga Department of Environment and Natural Resources (DENR)7 ang tanang mga kandidato nga molansar sa umaabot nga election sa paghatag og prayoridad sa tukmang paghipos sa basura sa panahon nga mapili sila sa umaabot nga piniliay.

Matud pa ni Engr. Amancio Dongkoy , Regional Solid Waste Management Coordinator sa DENR 7 nga gawas lang kun hatagan og tukmang konsentrasyon sa mga kadagkoan sa kagamhanan ang bahin sa hustong pag-atiman sa basura magpabiling anaa lang gihapon sa elementary level ang mga Filipino kun hisgotan ang maayong pag-atiman sa basura dinhi sa nasud.

Si Dongkoy maoy dinapit kagahapon atol sa AGIO Forum, usa ka programang gitambayayungan sa   Philippine Information Agency (PIA) ug sa DYMR Radyo ng Bayan.

Gihan-ok ni Dongkoy ang pagbasul niining kakuwang og kaalam sa katawhan bahin sa hustong    pagdumala sa basura ngadto una sa tanan sa mga magtutudlo sa tulunghaan ug sa mga politiko nga nagdumala sa nasud. Kini tungod kay una sa tanan ang mga magtutudlo mismo sa tulunghaan kuwang sa kasinatian sa pagtudlo sa tukmang paghipos sa basura ngadto sa mga kabataang ilang gitudloan. Hinungdan nga nanagko ang maong mga bata ug nahimong politiko ug sa maong kahimtang wala gihapon silay kabangkaagan sa tukmang pagdumala sa basura busa kuwang sila sa kadasig sa pagpatuman sa balaod bahin niini. Gumikan niini may panahon pa nga pinaagi sa hinayhinay nga paagi , sa pagpanguna sa mga politiko makakat-on ra ang katawhan sa Pilipinas sa hustong pagdumala sa basura ilabi na karong anaa na sa unang ang-ang kini sa   pagkat-on   pinaagi sa pagbahig sa basura hangtod nga mga 50 ka tuig gikan karon mahingpit na nga maayo moatiman og basura ang tanang Filipino, matud pa ni Dongkoy. (WC) (BANAT NEWS)