Nasudla'g espiritu

CEBU, Philippines - Mga tinun-an sa 2nd year ug 4th year sa Jaclupan National High School ang giingong nasudlan og dautang espiritu ug usa kanila giingong “milutaw sa hangin” kagahapon sa buntag hinungdan sa pagkaputol sa klase sa maong tunghaan.

Ang 17 ka tinun-an nagpangidaron og 13-anyos ngadto na sa 16-anyos ang daling gidala sa Mary’s Little Children kini aron mapahawa sa ilang lawas ang dautang espiritu nga misulod sa ilang lawas.

Ang 13-anyos nga nahinabi sa Banat News mibutyag nga dihang nasudlan ang 16-anyos nga 4th year kalit usab niyang nabantayan nga dunay daw misulod kaniya ug mimando kaniya nga molitok og ‘dili ka na tinuod.’

Gani, dihang gisulod na siya unta sa simbahan sa Jaclupan nga Mother of Perpetual Help gikatahong misiyagit siya ug mihilak tungod kay dili siya ganahang mosulod sa simbahan. Apan matud pa sa maong tinun-an wala siya masayod sa iyang gibuhat. Si Sr. Selfa Ho, evangelizer sa maong simbahan, mibutyag sa Banat News nga adunay duha ka 2nd year ang nasudlan sa daotang espiritu samtang 15 niini ang sa 4th year diin ang usa bayot ug ang 16 pulos na babaye.

Matud pa ni Ho nga gani, ang 16-anyos nga dalagitang misuway unta sa pagtabang og pray over nga aduna usab ‘history’ nga nasudlan og dautang espiritu, ang nasaksihan sa uban niyang mga kaubanan nga milutaw sa hangin.

Sumala pa ni Ho nga duna silay nakuhang video footage sa maong talagsaong hitabo, nagtuo si Ho nga ang maong tinun-an duna nay ‘entry point’ nga sayon alang sa mga espiritu nga makasulod.

Dugang pa ni Ho nga ang usa ka tawo nga adunay kaliwat sa mga tambalan aduna gyuy posibilidad nga masudlan sa mga daotang espiritu. Gawas niini, posibli usab nga masudlan sa daotang espiritu ang mga tawong kulang sa pagpasaylo sa iyang kaugalingon ug sa isi’g ka tawo.

Dugang pa ni Ho nga kasagaran sa iyang nabatyagan samtang sila nag-pray over sa mga bata nga kulang sa pagpasaylo ngadto sa ilang mga ginikanan ang mga tinun-an.                       “Naa silay kalagot sa ilang inahan ug amahan nga dili sila kapasaylo. Kasagaran relation gyud sa family ang hinungdan,” pasabot pa ni Ho.

Gihulagway usab ni Ho nga kun ang usa ka tawo nga nasudlan gunitan gani og laing tawo nga di preparado mas mograbe niini ang kusog sa daotang espiritu ug gani, magtapon-tapon pa kini.

Dugang paghulagway ni Ho nga ang kasagarang maigo sa susamang insidente mao kadtong mga tawong adunay depresyon o kasinati nga maoy hinungdan sa mental illness nga sakyan usab sa daotan.

Karung adlawa, giingong adunay pagabuhatong seminar ang grupo sa Mary’s Little Children sa Jaclupan National High School nga tapuson pinaagi sa usa ka Santos nga Misa ug ‘Deliverance’ ritwal nga paggapos ug pag-abog sa mga espiritu sa maong tunghaan. (/EIM) (BANAT NEWS)